Аўтамабілісты штурмуюць станцыі дыягностыкі

Перад Новым годам з'явіліся вялікія чэргі на тэхагляд.

Ажыятаж назіраецца на многіх дыягнастычных станцыях, кіроўцы займаюць чаргу з 7 раніцы. У «Белтэхаглядзе» кажуць, што ў снежні ў апошнія гады аўтамабіляў было менш, чым у кастрычніку-лістападзе. Спецыялісты звязваюць ажыятаж з увядзеннем дзяржпошліны, якую прывяжуць да праходжання тэхагляду, піша onliner.by.

- Зараз масава прыязджаюць тыя, хто павінен прайсці тэхагляд у пачатку і нават у сярэдзіне наступнага года, - распавялі супрацоўнікі адной з дыягнастычных станцый. - У чарзе кіроўцы абмяркоўваюць увядзенне дзяржпошліны.

Ажыятаж пачаўся пасля таго, як «дэпутаты» «палаты прадстаўнікоў» у двух чытаннях адобрылі законапраект. Аднак пакуль ён не прыняты канчаткова. Яшчэ наперадзе слуханне ў верхняй «палаце» «парламента», таксама яго павінен падпісаць Лукашэнка. Але кіроўцы ўжо актыўна абмяркоўваюць новаўвядзенне.

Нагадаем, дзяржпошліну хочуць прывязаць да масы і прыналежнасці аўтамабіля. Напрыклад, за «Аку» (яна трапляе ў «льготны» разрад - ад 1 да 2 тон) прыйдзецца заплаціць 390 тыс. рублёў. Чатырох з пяці аўтаўладальнікам (уласнікам машын масай ад 2 да 3 тон) прыйдзецца штогод плаціць 650 тыс. рублёў (5 б. в.). У разрад ад 2 да 3 тон трапляюць многія аўтамабілі прадстаўніцкага класа - BMW 7-Series, Mercedes S-Class, Audi A8, а таксама большасць уседарожнікаў. Іх уладальнікаў за дазвол папросяць «адшпіліць» 910 тыс. рублёў (7 б. в.) у год. Легкавікі масай звыш 3 тон - даволі рэдкая з'ява для Беларусі. Гэта вялікія пазадарожнікі накшталт Hummer H2. Дзяржпошліна для іх уласнікаў складзе 1,3 млн рублёў (10 б. в.). Асобна прыйдзецца плаціць за дазвол да дарожнага руху ўладальнікам прычэпаў, матацыклаў і скутэраў (130 тыс. рублёў - 1 б. в.). Іншая справа, калі аўтамабіль зарэгістраваны на арганізацыю. Там стаўкі для гэтых жа пазіцый некалькі вышэй.

На форуме пасля абвяшчэння ставак адразу падлічылі, што цяпер прайсці тэхагляд вельмі нават выгадна. На дадзены момант праходжанне ТА можа абыйсціся прыкладна ў 150 тыс. рублёў. Калі ж закон прымуць, то з 1 студзеня ўладальнік пазадарожніка масай больш за 3 тоны за дазвол на два гады заплаціць 2,6 млн рублёў. А калі такі вялікі аўтамабіль зарэгістраваны на юрыдычную асобу, то ўвогуле 3,38 млн. На фоне чутак аб магчымым павышэнні базавай велічыні гэта толькі падагрэла ажыятаж.

- Шчыра кажучы, мы прагназавалі такую сітуацыю, - паведамілі ва УП «Белтэхагляд». - Ёсць каманда павялічыць працоўны дзень, адмяніць выходныя. Наступны тыдзень можа стаць для нас самай напружаным у годзе.

Тым часам, аўтамабілісты плануюць правесці акцыю пратэсту «Стоп-падатак». Яна адбудзецца 20 снежня ў 18.00 на Праспекце Незалежнасці ў Менску. У астатніх гарадах - на галоўных плошчах.

Менчукі ў сацыяльных сетках прапануюць аўтамабілістам пасля 17.30 рухацца да Плошчы Незалежнасці з любога кірунку. Роўна ў 18.00 удзельнікам акцыі прапануюць знізіць хуткасць, спыніцца, уключыць «аварыйку» і сігналіць. Пешаходаў таксама заклікаюць падтрымаць акцыю.