Лукашэнка: Купілі Mercedes за $100 тысяч, а падатак заплаціць не можаце?
207- 30.12.2013, 14:20
- 152,137
Кіраўнік запатрабаваў ў 2014 годзе разабрацца з «празмернасцямі».
Лукашэнка даручыў правесці аптымізацыю ў сферах аховы здароўя і адукацыі. Адпаведнае даручэнне кіраўнік даў сёння, наведваючы гарадскі дзіцячы цэнтр медыцынскай рэабілітацыі «Пралеска» ў аграгарадку Ракаў Валожынскага раёна, перадае БелТА.
Прыбыўшы ў дзіцячы цэнтр, Лукашэнка пацікавіўся, наколькі паслугі гэтага і іншых падобных устаноў запатрабаваныя. Міністр аховы здароўя Васіль Жарко далажыў, што ў дадзеным цэнтры створаныя ўсе ўмовы для лячэння і рэабілітацыі дзяцей, і ён, несумненна, патрэбны. Нядаўна завяршылася рэканструкцыя матэрыяльнай базы цэнтра.
«Мы, вядома, для дзяцей шкадаваць нічога не будзем, але празмернасцяў быць не павінна. Дзяржава не можа на сябе браць залішнюю нагрузку, - сказаў кіраўнік. - Калі трэба кагосьці рэабілітаваць, аднавіць пасля хваробы, лячыць, гэта трэба рабіць. Але залішняга ні ў ахове здароўя, ні ў адукацыі быць не павінна».
Гаворачы аб дзяржаўных выдатках на сацыяльную сферу, Лукашэнка згадаў аб увядзенні так званага транспартнага падатку.
«Калі трэба дзесьці плячо падставіць, тады пачынаюць: Mercedes купіў за $100 тыс., а падатак транспартны заплаціць (каля $70), каб дарогі добрыя былі, не можам», - заўважыў ён.
«Трэба ж разумець, што гэта вялікія грошы», - падкрэсліў кіраўнік, адзначыўшы, што толькі на рэканструкцыю дзіцячага цэнтра «Пралеска» выдаткавана каля 110 млрд.
«Дзе трэба - там трэба. І ўсё гэта неабходна ў наступным годзе аптымізаваць. Як бы ні было складана, цяжка, колькі трэба для дзяцей - гэта прыярытэт. У першую чаргу дзеці. Потым усё астатняе», - дадаў ён.
Лукашэнка таксама звярнуў увагу на неабходнасць кадравай аптымізацыі з прычыны досыць вялікіх суадносінаў абслуговага персаналу да ліку пацыентаў. Кіраўнік адзначыў, што, напрыклад, Палац незалежнасці абслугоўваюць не больш за 10 чалавек.
«З вас і пачнем аптымізацыю ў ахове здароўя і адукацыі. Трэба загрузіць людзей і даць ім нармальную зарплату, альбо яны сапраўды разбягуцца ўсе па Расеі ці яшчэ недзе», - сказаў ён, звяртаючыся да губернатара Менскай вобласці Сямёна Шапіры.
Паводле слоў Лукашэнкі, кіраўнікам лячэбных устаноў неабходна даць права пакінуць у арганізацыях столькі работнікаў, колькі неабходна, пры захаванні існуючага фонду зарплаты.
«Калі ласка, хоць у адзіночку працуй, але павінен быць вынік. Вось твае грошы - падзяляй. А з міністэрскага кабінета нічога не раздзеліш. Тады яны будуць шанаваць і лічыць гэтыя грошы і да нас прэтэнзій не будуць прад'яўляць», - лічыць ён.
Звяртаючыся да чыноўнікаў, Лукашэнка запатрабаваў не чакаць дадатковых нарматыўных актаў, а дзейнічаць: «Першы квартал пройдзе - паглядзім».
Васіль Жарко адзначыў, што за год у сферы аховы здароўя ўжо на 1,4 тыс. скарочаная колькасць работнікаў. Гэта ў першую чаргу закранула інжынерныя і кадравыя службы, бухгалтараў і эканамістаў.