Клічко папярэдзіў Януковіча (Відэа)

Лідар партыі УДАР звярнуўся да ўкраінцаў.

Віталь Клічко папярэдзіў улады Украіны, што адказнасць за магчымую пралітую кроў на Майдане Незалежнасці будзе ляжаць на іх і асабіста на прэзідэнце Віктары Януковічы. Пра гэта заявіў лідар партыі «УДАР» у сваім звароце да ўкраінскага народу.

«Цяпер войскі ачапілі Майдан. Яшчэ раз хачу падкрэсліць: калі мірных дэманстрантаў будуць разганяць, калі сёння пральецца кроў, уся адказнасць будзе ляжаць на чалавеку, які аддаў злачынны загад і асабіста на прэзідэнце Украіны Віктары Януковічы», - сказаў Віталь Клічко.

Палітык заклікаў украінцаў не быць абыякавымі, прыйсці на Майдан і адстаяць сваё права жыць у свабоднай краіне.

«Не ў той краіне, дзе паліцыянтам дубінкай можна затыкаць рот любому. Не будзьце абыякавымі. Калі нас прыйдзе шмат, нас немагчыма разагнаць. Мы ўсе павінны сказаць, дзе мы хочам жыць, у якой краіне. Майдан - гэта не тэрыторыя, гэта пляцоўка, дзе мы можам адкрыта, шчыра сказаць, што мы хочам жыць у сучаснай краіне, дзе ёсць права свабодна жыць і гаварыць, дзе вышэйшая каштоўнасць - права кожнага чалавека. Не будзьце абыякавымі, прыходзьце», - заклікаў Віталь Клічко.

Нагадаем, сёння, 9 снежня, каля 13:00 па мясцовым часе цэнтр Кіева быў акружаны байцамі ўнутраных войскаў і спецпадраздзялення «Беркут». На думку апазіцыйных палітыкаў, а таксама актывістаў Еўрамайдана, гэта з'яўлялася падрыхтоўкай да магчымага штурму будынка гарсавета, які займаюць ўдзельнікі антыўрадавых пратэстаў у Кіеве.