Пластыкавыя карткі - па-за законам

Да канца года беларусам патрэбна паўторна ўкласці дамовы на ўсе банкавыя карткі.

Рэч у тым, што ў канцы студзеня з Банкавага кодэкса зніклі такія словы, як «банкавыя пластыкавыя карткі» (замест іх цяпер будуць банкавыя аплатныя карткі) і «карт-рахунак» (ён сягоння стаў бягучым рахункам), піша «Комсомольская правда в Беларуси».

Здавалася б, змяніліся толькі назвы, самі ж карткі як ляжалі ў нашых партманетах, так і ляжаць. Праўда, цяпер, каб выканаць заканадаўства, банкам давядзецца паўторна ўкласці дамовы з усімі трымальнікамі картак. Бо слова «карт-рахунак» і «пластыкавая картка», якія там запісаныя, цяпер па-за законам! Улічваючы, што сёння практычна ў кожнага беларуса ёсць картка, а то і некалькі, банкам давядзецца паўторна ўкласці блізу 10 млн кантрактаў.

- Паўторна ўкласці дамову са сваім банкам трэба да канца гэтага года. Калі ж вы не звернецеся ў банк і не ўкладзяце новае пагадненне, банку давядзецца закрыць ваш рахунак і заблакаваць вашу картку, - папярэдзілі ва ўправе інфармацыі і грамадскіх сувязяў Нацбанка.

Банкі да паўторнага ўкладання пагадненняў ужо гатовыя. І абяцаюць, што шмат часу ў кліентаў гэта не забярэ.

- Гэта звычайная стандартная банкавая праца. Часу працэдура запатрабуе не больш за тое, што патрабуецца для выдачы або працягу пластыкавай карткі, - распавялі ў прэс-службе Беларусбанка. - Што да дакументаў, з сабой трэба мець толькі пашпарт.

Каб паўторна ўкласці дамову, трэба звяртацца ў той аддзяленне банка, дзе выдалі картку.