Рада Бяспекі ААН асудзіла ядзерныя выпрабаванні ў КНДР

Рада Бяспекі ААН рашуча асудзіла правядзенне КНДР трэцяга ядзернага выпрабавання.

Рада Бяспекі заявіла, што ў сілу сур'ёзнасці кроку Паўночнай Карэі яна неадкладна распачне абмеркаванне адпаведных захадаў, паведамляе ВВС.

Тэкст заявы зачытаў перад журналістамі міністр замежных спраў Паўднёвай Карэі Кім Сун Хван.

«Чальцы Рады Бяспекі рашуча асуджаюць гэтае выпрабаванне, якое стала грубым парушэннем трох рэзалюцый Рады», - гаворыцца ў заяве.

У асобным выступе ў Вашынгтоне амерыканскі міністр абароны Леон Панэта, які сыходзіць са сваёй пасады, заявіў, што ядзерныя амбіцыі Паўночнай Карэі з'яўляюцца сур'ёзнай пагрозай бяспекі ЗША.

Ён параўнаў гэтую краіну з Іранам, назваўшы яе дзяржавай-выгнанкай.

Генеральны сакратар ААН Пан Гі Мун назваў такі крок відавочным і сур'ёзным парушэннем рэзалюцый ААН, атаксама дэстабілізацыйнай правакацыяй.

У аўторак Паўночная Карэя абвясціла аб паспяховым правядзенні падземнага ядзернага выпрабавання - трэцяга ў сваёй гісторыі. У гэтым годзе Пхеньян папярэджваў аб хуткім правядзенні ядзерных выпрабаванняў.

Геалагічная служба ЗША ацаніла магнітуду штуршкоў у 4,9. Агенцтва ААН ядзернага маніторынгу заявіла аб незвычайнай сейсмічнай з'яве з параметрамі выбуху.

У заяве дзяржаўнага інфармацыйнага агенцтва КНДР паведамляецца аб паспяховым выпрабаванні кампактнай ядзернай прылады, якая мае вялікую выбуховую сілу.

Прэзідэнт ЗША Барак Абама заклікаў сусветную супольнасць да неадкладных і жорсткіх дзеянняў.

Ён заявіў, што правакацыйны крок Пхеньяна ні якім чынам не умацаваў бяспеку Паўночнай Карэі. Вашынгтон прадоўжыць пільна сачыць за сітуацыяй у рэгіёне і будзе выконваць свае абавязанні перад азіяцкімі партнёрамі ў забеспячэнні бяспекі, дадаў прэзідэнт.

Расейскі МЗС у афіцыйнай заяве паскардзіўся на тое, што парушэнне нормы міжнароднага права здзейсніла краіна, якую з Расеяй «звязвае доўгая гісторыя добрасуседства».

Экзамен для Кітая

У дачыненні да Паўночнай Карэі ўжо ўведзена мноства розных міжнародных санкцый, аднак належнага эфекту на ўлады краіны яны не маюць.

Цяпер галоўнае пытанне складаецца ў тым, што яшчэ можа распачаць сусветная супольнасць, не справакаваўшы пры гэтым яшчэ большы крызіс.

Са слоў Уільямсан, сёй-той у Вашынгтоне мяркуе, што магутным вагаром ціску на Пхеньян можа стаць удар па фінансавых інтарэсах КНДР. Аднак большасць перакананая, што ў сапраўдны момант эфектыўна развязаць сітуацыю можа толькі Кітай - адзіны традыцыйны хаўруснік Паўночнай Карэі.

Такім чынам, выбіраючы ў гэтай сітуацыі тактыку ў дачыненні да Пхеньяна, новым уладам у Пекіне трэба прайсці сур'ёзны тэст перад усёй сусветнай супольнасцю.

Пакуль што Кітай выступіў з жорсткім асуджэннем дзеянняў свайго хаўрусніка, заклікаўшы ўлады Паўночнай Карэі прытрымлівацца міжнародных абавязацельстваў аб неўжыванні ядзернай зброі і не пагаршанні становішча на Карэйскім паўвостраве.

Напружанне ў рэгіёне

За некалькі гадзін да заявы КНДР паўднёвакарэйскія СМІ паведамілі пра землятрус штучнага характару ў раёне, прылеглым да палігону на паўночным-усходзе КНДР. Войска Паўднёвай Карэі прыведзенае ў стан падвышанай баявой гатоўнасці.

Згодна з Геалагічнай службай ЗША, штуршкі адбыліся на глыбіні 1 км. Метэарычнае агенцтва Японіі заявіла, што яны «адрозніваліся ад звычайнага землятрусу».

Улады Японіі выказалі ўпэўненасць у тым, што падземныя штуршкі, якія адбыліся на тэрыторыі Паўночнай Карэі ў аўторак раніцай, былі выкліканыя ядзерным выпрабаваннем.

«Мы верым, што КНДР правяла выпрабаванні, улічваючы папярэдні досвед», - сказаў журналістам галоўны сакратар кабінета міністраў Японіі Есіхідэ Суга.

У студзені Паўночная Карэя абвясціла аб намеры правесці трэцяе ядзернае выпрабаванне ў сваёй гісторыі, нягледзячы на папярэджанні Рады Бяспекі ААН аб магчымых наступствах такога кроку.

МЗС Расеі праводзіць тэрміновыя кансультацыі з Дзярждэпартаментам ЗША.

Як распавялі Рускай службе ВВС у МНС Прымор'я, усе экстраныя службы рэгіёну працуюць у звычайным рэжыме, бо ніякіх пагроз бяспекі не зафіксавана. Радыяцыйны фон знаходзіцца ў норме.

Ракеты і не толькі

Папярэднія ядзерныя выпрабаванні былі праведзены КНДР у 2006 і 2009 гадах. Кожны раз яны праходзілі пасля выпрабавальных пускаў ракет далёкага радыусу дзеяння.

У аўторак, яшчэ да афіцыйнага пацверджання аб правядзенні ядзернага выпрабавання, улады Паўночнай Карэі паабяцалі прадоўжыць запускі ракет далёкага радыусу дзеяння, нягледзячы на санкцыі, накладзеныя на Пхеньян Арганізацыяй Аб'яднаных Нацый пасля запуску такой ракеты ў снежні мінулага года.

У заяве палітбюро Працоўнай партыі КНДР гаворыцца таксама пра гатоўнасць звярнуцца да актыўных дзеянняў для абароны суверэнітэту краіны.

Злучаныя Штаты, Паўднёвая Карэя і Японія заклікалі Паўночную Карэю не праводзіць новае ядзернае выпрабаванне. Найбліжэйшы хаўруснік КНДР, Кітай, таксама заклікаў да стрыманасці.