18.02.2013

Міністр і памочнік Лукашэнкі трапіліся на туалетах 111

8:12, — Палітыка

Алег Качан і Ігар Заічкоў адкажуць перад дыктатарам за туалеты на сваіх дачах.

Нагадаем, што пасля сходу ў Нацыянальным алімпійскім камітэце, які адбыўся ў кастрычніку 2012 года, Лукашэнка адправіў у адстаўку міністра спорту і турызму Алега Качана і свайго памочніка па пытаннях фізічнай культуры, спорту і развіцця турызму Ігара Заічкова. Перад гэтым на сходзе НАК кіраўнік падвергнуў жорсткай крытыцы дзейнасць гэтых чыноўнікаў, намякаючы, што яны больш клапаціліся пра сваё дабро, чым пра развіццё беларускага спорту, піша «Ежедневник».

Таму цалкам заканамерна, што пасля сходу ў НАК, Лукашэнка даручыў праваахоўным органам старанна разабрацца з дзейнасцю спартыўных чыноўнікаў, асабліва ў сферы будаўніцтва іх асабістай нерухомасці. У першую чаргу гаворка ішла пра «святую троіцу» Качан, Заічкоў і дырэктар установы «Рэспубліканскі цэнтр алімпійскай коннага спорту і конегадоўлі» Віктар Міхадзюк. Крымінальная справа ў дачыненні да Міхадзюка ўжо ўзбуджаная. Яму інкрымінуецца злоўжыванне ўладай або службовымі паўнамоцтвамі. Цяпер вось справа можа дайсці і да яго заступнікаў.

Галоўнае ўпраўленне па барацьбе з эканамічнымі злачынствамі МУС выявіла спецыфічныя аб'екты нерухомасці, якія былі ўсталяваныя на дачных участках Качана і Заічкова за чужы кошт. Прычым, гэтыя аб'екты нерухомасці будуць у прамым сэнсе смярдзець яшчэ вельмі доўга.

Па дадзеных ГУБЭЗ МУС, у чэрвені 2012 года на вытворчым лесаперапрацоўчым участку «Закрэўшчына» ДЛГУ «Уздзенскі лясгас» былі вырабленыя дзве дваровыя прыбіральні. Аб'екты нерухомасці вырабляліся з лесаматэрыялаў, але ў вельмі добрым, можна нават сказаць, прэзентабельным выглядзе, таму і кошт прыбірален склаў 10 мільёнаў рублёў за кожны.

Дваровыя туалеты былі адлюстраваныя ў бухгалтарскім ўліку прадпрыемства і ў далейшым былі адгружаныя ў «Рэспубліканскі цэнтр алімпійскай падрыхтоўкі коннага спорту і конегадоўлі», размешчаны ў п. Ратамка Менскага раёна. Аднак рэальна туалеты былі дастаўленыя ў садоўніцкае таварыства «Моя отрада» ў вёсцы Закаблукі Менскага раёна (каля 10 км. Ад МКАД) і ўстаноўленыя на зямельных участках тагачасных памочніка Лукашэнкі па пытаннях фізічнай культуры, спорту і развіццю турызму Ігара Заічкова і міністра спорту і турызму Алега Качана.

Дзеля справядлівасці варта адразу адзначыць, што крымінальных спраў у дачыненні да Алега Качана і Ігара Заічкова пакуль не ўзбуджана. Па незразумелай прычыне фігурантамі справы сталі дырэктар ДЛГУ «Уздзенскі лясгас» і начальнік вытворчага лесаперапрацоўчага ўчастка «Закрэўшчына» гэтага лясгаса. Менавіта ім інкрымінуецца здзяйсненне злачынства па ч.2 арт.210 Крымінальнага кодэкса Беларусі (крадзеж шляхам злоўжывання службовымі паўнамоцтвамі).

На думку Генеральнай пракуратуры, якая распачала крымінальную справу, менавіта яны далі ўказанне падначаленым ім па службе работнікам вырабіць з піламатэрыялаў, якія знаходзяцца на балансе ўчастка «Закрэўшчына», названыя дачныя прыбіральня, прычыніўшы прадпрыемству шкоду ў 20 мільёнаў рублёў.

У чым складаўся крадзеж, калі туалеты былі дастаўленыя на дачы гэтак уплывовых асоб, зразумець досыць складана. Магчыма, з гэтым разбярэцца Следчы камітэт, куды на расследаванне перададзеная крымінальная справа.

Напісаць каментар (111)

0

Tweet

Экспарт