Кіраўніцтва «Дынама-Менск» рыхтуецца да адстаўкі

Спартыўны дырэктар ХК «Дынама-Мінск» Ігар Матушкін і генеральны дырэктар Аляксей Торбін гатовыя сысці ў адстаўку, калі таго запатрабуе назіральны савет клуба.

Пра гэта на сустрэчы з журналістамі заявілі абодва функцыянера, паведамляе БелТА.

- Ці з'яўляецца нявыхад каманды ў плэй-оф чэмпіянату КХЛ віной кіраўніцтва клуба? Не наша прэрагатыва даваць гэтаму ацэнкі, хай гэта зробяць іншыя. Я працаваў сумленна, рабіў памылкі і не баюся іх прызнаць. Калі маю працу палічаць нездавальняючай, пайду ў адстаўку. Тут паміж выкананнем і невыкананнем задачы на сезон атрымалася тонкая грань: забей мы на апошніх хвілінах матчу з «Салаватам Юлаевым» трэцюю шайбу - і былі б у плэй-оф. Гульцоў і трэнераў цяпер насілі б на руках, - сказаў Ігар Матушкін.

- Мы гатовыя сысці ў адстаўку, калі кіраўніцтва палічыць, што гэта дапаможа прагрэсу клуба. Але мы, працуючы тут ужо трэці год, зразумелі, што сіла клуба ў тым, каб была стабільнасць. Кожны супрацоўнік за гэты час набіў гузы, наступіў на граблі. І калі прыйдуць новыя людзі, то ім таксама прыйдзецца пачынаць з гэтага ж. Па велічыні бюджэту мы з'яўляемся ў КХЛ сераднякамі, і нават за межамі васьмёркі ў Заходняй канферэнцыі. Таму з такімі фінансавымі магчымасцямі кожны раз трапляць у плэй-оф складана. Што тычыцца ацэнкі выступлення каманды ў гэтым сезоне і высноў, то іх будзе рабіць назіральны савет клуба, - адзначыў Аляксей Торбін.

Нагадаем, 17 лютага менскае «Дынама» прайграла апошні матч Кантынентальнай хакейнай лігі і не трапіла ў плэй-оф.