Алег Волчак: СК хавае праўду пра выбух каля КДБ

Следству выгадна, каб жанчына, падазраваная ў тэракце, маўчала, як гэта было з Канавалавым.

Так былы следчы пракуратуры і кіраўнік праваабарончага цэнтра «Прававая дапамога насельніцтву» Алег Волчак пракаментаваў сайту charter97.org заяву Следчага камітэта аб раскрыцці крымінальнай справы па факце выбуху каля адміністрацыйнага будынка ўпраўлення КДБ па Віцебскай вобласці.

«Як следчы, магу сказаць, што афіцыйная версія выглядае непраўдападобна. На гэта паказвае той факт, што ў арыштаванай няма адукацыі. Каб вырабляць выбуховыя прылады, трэба добра разбірацца ў хіміі і мець доступ да хімрэактываў. На гэтым фоне запісы ў сшытак пра выбуховыя рэчывы і выразкі з газет выглядаюць прымітыўна», - адзначыў юрыст.

Ён таксама дадаў, што падазроная можа быць псіхічнахворай.

«Магчыма, што гэтая жанчына, раней судзімая за крадзяжы, у чарговы раз трапілася на крадзяжы. Улічваючы гэтую акалічнасць, яе пераканалі ўзяць на сябе адказнасць за выбух і маўчаць. Далей заявілі, што падчас правядзення допыту абвінавачаная ад дачы паказанняў адмовілася, скарыстаўшыся правамі, прадстаўленымі арт. 27 Канстытуцыі Рэспублікі Беларусь», - падкрэсліў праваабаронца.

Алег Волчак звярнуў увагу на факт, што на працягу мінулага тыдня да яго звярталіся за дапамогай жанчыны-інваліды, у якіх у прымусовым парадку хочуць узяць адбіткі пальцаў.

«Не выключана, што пасля арышту жыхаркі Віцебска, рушыць услед агульнарэспубліканская кампанія па зборы адбіткаў пальцаў ужо ў жанчын. Але галоўнай прычынай майго недаверу афіцыйнай версіі з'яўляецца той факт, што на прэс-канферэнцыі Следчага камітэта па гэтай справе не былі названыя матывы злачынства. Усё гэта яшчэ раз даказвае, што сілавыя структуры імкнуцца падняць свой імідж і аўтарытэт у вачах Лукашэнкі і атрымаць чарговыя званні і ўзнагароды, чым знайсці ісціну», - сказаў на заканчэнне юрыст.

Нагадаем, Следчы камітэт сцвярджае, што раскрыў крымінальную справу па факце выбуху каля адміністрацыйнага будынка ўпраўлення КДБ па Віцебскай вобласці.

Пра гэта паведамілі сёння на сумесным брыфінгу начальнік упраўлення Следчага камітэта па Віцебскай вобласці Уладзімір Шалухін і начальнік УУС Віцебскага аблвыканкама Ігар Яўсееў.