Плата за навучанне ў ВНУ вырасце яшчэ на 10%

Міністр адукацыі Беларусі Сяргей Маскевіч заяўляе, што аплата за навучанне ў ВНУ з красавіка 2013 года можа павялічыцца на 8-10%.

«З красавіка можа павялічыцца аплата за навучанне ў ВНУ ў межах 8%. Але не больш чым на 10%», - паведаміў Маскевіч на прэс-канферэнцыі ў аўторак у Менску, піша «Інтэрфакс».

Ён таксама заявіў, што правілы прыёму ў ВНУ ў гэтым годзе не зменяцца, але набор скароціцца.

«У правілах прыёму ў ВНУ ў гэтым годзе нічога мяняцца не будзе. Усё будзе стабільным і звыклым для грамадзян. Ужо пачалася рэпетыцыйная кампанія па падрыхтоўцы да ўступных іспытаў», - паведаміў Маскевіч.

Разам з тым ён адзначыў, што ў бягучым годзе «будзе менш набор у ВНУ, чым у мінулым», скароціцца набор на некаторыя спецыяльнасці. Міністр растлумачыў гэта тым, што ў параўнанні з мінулым годам будзе менш колькасць выпускнікоў 11-х класаў агульнаадукацыйных школ.

Маскевіч удакладніў, што ў мінулым годзе было 64,5 тыс. выпускнікоў 11-х класаў, у гэтым годзе іх будзе 60 тыс., а планавая лічба прыёму ў ВНУ - 30,5 тыс. абітурыентаў. «Гэта больш чым 50% ад колькасці выпускнікоў 11-х класаў», - адзначыў ён. «Плануецца, што 23,6 тыс. абітурыентаў будуць прынятыя на дзённую форму навучання ў ВНУ, 6,9 тыс. - на завочную», - удакладніў міністр.

Распавядаючы пра тое, на якія спецыяльнасці будзе скарочаны набор у ВНУ ў гэтым годзе, Маскевіч праінфармаваў: «на юрыдычныя спецыяльнасці - на 7 - 10%, на эканамічныя - на 15 - 20%, на педагагічныя - на 14 - 15%, на гуманітарныя - на 15 - 20%».