Унутраныя войскі МУС узброіліся воднымі гарматамі

Часопіс «Спецназ» прадставіў раней засакрэчаную машыну - водную гармату беларускага вырабу.

У Беларусі яны знаходзяцца на ўзбраенні ўнутраных войскаў МУС. Распрацавалі «Цунамі» спецыялісты ўнутраных войскаў, а сабралі на прадпрыемстве «Белкамунмаш», вядомым вырабам тралейбусаў. Поўная назва машыны - аўтацыстэрна спецыяльная АЦС-40 «Цунамі». Першы аўтамабіль сышоў з канвеера ў 2006 годзе, піша «Народная воля».

У якасці базавага шасі для «Цунамі» выбралі двухвосевы грузавік МАЗ з рухавіком магутнасцю 230 конскіх сіл. Аб'ём цыстэрны для вады – 7 000 літраў. Калі не лічыць сеткаватага адвалу, то спецабсталяванне ў «Цунамі» тое ж, што і ў звычайнай пажарнай аўтацыстэрны. Гэта лафетная руля і пажарная помпа прадукцыйнасцю 20 літраў у сэкунду. «Далёкасць страляніны» водным струменем аўтацыстэрны - 50 м.

Важкія краты на бамперы, рулі-лафеты, загорнутыя брызентам, здольныя паварочвацца пад рознымі кутамі. Зверху ўсталяваны пражэктар, а таксама бліскавічны ліхтар сіняга колеру. Органы кіравання - кнопкі на пульце - змешчаныя ў кабіне. Баявы разлік машыны - усяго два чалавекі: кіроўца і «палівальнік». У ягоныя задачы ўваходзіць не проста накіраваць струмень, а зрабіць гэта з ювелірнай дакладнасцю.

Дзеянне «Цунамі» выпала ўбачыць некалькі разоў - падчас «паказальных выступаў». Аўтамабіль, вядома, дзіўны. Бруя даслоўна разразае прастору і - такое адчуванне - можа папросту адкінуць чалавека на некалькі метраў назад, перакуліць яго дагары нагамі. Зрэшты, выпрабаваць гэтую здагадку на сабе нават хаджалыя байцы «спецназа» не рызыкуюць.

Якое прызначэнне ў «Цунамі»? Спецыялісты тлумачаць: большай часткай прафілактычнае. Да прыкладу, аўтамабіль з в/ч 5448 выязджаў мінулай восенню на футбольны матч Лігі чэмпіёнаў, у якім БАТЭ сустракаўся з «Зенітам». Ад буяных піцерскіх фанатаў усякага можна было чакаць. Абышлося без масавых беспарадкаў, і «Цунамі» сціпла прастаяў без работы ў баку.

Яшчэ адзін варыянт - здушэнне беспарадкаў у папраўчых калоніях. Падчас леташніх вучэнняў унутраных войскаў, якія прайшлі ў брыгадзе спецвойскаў, «Цунамі» акурат і задзейнічалі.

Пра тое, ці будуць выкарыстоўваць водныя гарматы для здушэння масавых пратэстаў, часопіс не паведамляе.