The Independent: Беларусы страцілі «пасведчанне аб смерці» СССР
31- 8.02.2013, 15:32
У Беларусі знік з архіва гістарычны дакумент, які азнаменаваў распад Савецкага Саюза.
Пра гэта паведамляе The Independent (пераклад - charter97.org) са спасылкай на Станіслава Шушкевіча - першага кіраўніка незалежнай Беларусі і непасрэднага ўдзельніка падпісання гэтага пагаднення.
«Цяжка паверыць, што дакумент такога ўзроўню знік, але гэта факт», - кажа Станіслаў Шушкевіч.
Страта выявілася, калі палітык займаўся даследаваннямі для напісання сваіх мемуараў. Станіслаў Шушкевіч упэўнены, што арыгінал Белавежскага пагаднення быў скрадзены і прададзены якім-небудзь беларускім чыноўнікам.
Пагадненне было падпісана ў снежні 1991 года падчас сустрэчы лідэраў Беларусі, Украіны і Расеі ў Белавежскай пушчы. Акрамя Станіслава Шушкевіча там прысутнічалі Леанід Краўчук і Барыс Ельцын.
У ім гаварылася, што «Саюз ССР як суб'ект міжнароднага права і геапалітычная рэальнасць спыняе сваё існаванне». Падпісанне гэтага дакумента разбурыла планы савецкіх уладаў і Міхаіла Гарбачова па захаванні цэласнасці СССР.
У Беларусі засталіся толькі копіі важнага дакумента.