Выведка ЗША: Беларусь у 2013 годзе чакае новы крызіс
112- 13.03.2013, 8:43
(абноўлена) Эканамічная сітуацыя ў Беларусі застаецца хісткай, краіна можа сутыкнуцца з новым эканамічным крызісам.
Пра гэта гаворыцца ў штогадовым дакладзе дырэктара нацыянальнай выведкі ЗША Джэймса Клэпера, прысвечаным сучасным пагрозам, піша РІА «Новости».
«Аляксандр Лукашэнка перажыў крызіс, які стаў самай моцнай пагрозай яго ўлады з 1994 года. Карэкціроўкі і фінансавая дапамога з боку Расеі нівеліравалі большасць негатыўных наступстваў гэтага крызісу, а таксама прывялі да паступовага згасання апазіцыйнага руху», - гаворыцца ў дакладзе за 2012 год, які Джэймс Клэпер прадставіў у аўторак у сенацкім камітэце па выведцы.
«Разам з тым, эканамічная сітуацыя ў Беларусі застаецца хісткай, і адмова Лукашэнкі ад структурных рэформаў стварае верагоднасць таго, што краіна ўступіць у новы эканамічны крызіс у 2013 годзе», - гаворыцца ў дакуменце.
Беларускія эканамісты пацвярджаюць, што гэты год будзе для ўладаў адным з самых цяжкіх. Пра гэта заявіў Леанід Заіка ў інтэрв'ю «Еўрарадыё».
«Эканамічныя пагрозы дастаткова высокія. Гэты год вылучаецца неабходнасцю заплаціць як мінімум тры мільярды даляраў па пазыках. Такіх грошай пакуль няма. З пункту гледжання забеспячэння прыросту валютнай плыні сітуацыя, у прынцыпе, не лепш, чым у мінулым годзе», - сказаў эканаміст.