Армянскія СМІ распавялі пра Колевы баўкі ў Ерэване

Сын беларускага правадыра трапіў у скандал у Арменіі.

Абурэнне мясцовых незалежных СМІ выклікаў той факт, што за два дні дзевяцігадовы хлопчык «прамантачыў» амаль 500 даляраў з дзяржбюджэту краіны, піша партал Express.am.

Карэспандэнт газеты «Айкакан Жаманак» азнаёміўся з дакумэнтам МЗС, згодна з якім, выканаўца абавязкаў начальніка агенцтва «Служба дзяржаўнага пратакола» Вардан Асаян уклаў кантракт з забаўляльным цэнтрам «Play City», якім апошні абавязаўся «выканаць адпаведныя паслугі» ўзначальванай Лукашэнкам дэлегацыі ў рамках візіту ў Арменію.

Паводле выдання, паслугі апісаныя падрабязна. Сын Лукашэнкі 6 разоў карыстаўся аўтадроме, 11 разоў - аўтаматнымі гульнямі, двойчы наведаў 7D кінатэатр, здзейсніў заезд на 19 колаў у картынг-клубе. Гэткі кантракт быў укладзены са стэндавым стрэльбішчам комплексу «Валенсія». Увогуле паводле двух кантрактаў з дзяржбюджэту Арменіі было выплачана больш за 200 тысяч драмай (больш за $ 480).

«Рэч, вядома, не ў суме. Рэч у ўяўленнях нашых чыноўнікаў аб дзяржаўным бюджэце. На іхную думку, 9-гадовы сын Лукашэнкі - чалец афіцыйнай дэлегацыі, практычна прэм'ер або міністр, і за ягоныя забавы трэба плаціць з дзяржбюджэту Арменіі.

Улічваючы тое, што блізкі сябар беларускага правадыра [буйны прадпрымальнік, лідэр партыі «Квітучая Арменія»] Гагік Царукян меў вялікі ўклад у тое, каб гэты візіт супаў з цырымоніяй адкрыцця ягонай царквы, было б больш лагічна, калі б ён плаціў гэтыя 200 000 драмаў з сваёй кішэні. Але нашы чыноўнікі прынялі прынцыповую пастанову: за Колевы баўкі павінен плаціць дзяржбюджэт Арменіі, гэта больш сур'ёзна і адпавядае значнасці 9-гадовага хлопчыка», - у прыватнасці, адзначае карэспандэнт «Айкакан Жаманак».