Кіраўніцтва НЦІУ ў знак пратэсту звольнілася ў поўным складзе

Дзяржслужачыя з Нацыянальнага цэнтра інтэлектуальнай уласнасці пратэстуюць супраць адміністрацыйнай рэформы.

Канфлікт узнік з-за нязгоды кіраўніцтва Нацыянальнага цэнтра інтэлектуальнай уласнасці (НЦІУ) з адміністрацыйнай рэформай, якая праводзіцца ўладамі, і па якой спецыялісты патэнтнага органа пазбаўляліся статусу дзяржаўных служачых. У знак пратэсту кіраўніцтва НЦІУ і частка работнікаў сышло ў адстаўку.

Работнікі НЦІУ размясцілі на афіцыйным сайце арганізацыі адкрыты ліст, у якім падзяліліся бачаннем праблемы. «Вар'яцтва не можа працягвацца доўга», напісалі ў адкрытым лісце работнікі патэнтнага органа.

Прапануем тэкст ліста цалкам:

«Калектыў Нацыянальнага цэнтра інтэлектуальнай уласнасці выказвае шчырую ўдзячнасць свайму кіраўніку Д.І. Нядзвецкаму і дзякуе яго за тое, што, не шкадуючы сіл, ён на працягу некалькіх месяцаў змагаўся за захаванне нацыянальнай сістэмы інтэлектуальнай уласнасці і тых унікальных спецыялістаў, розум і талент якіх з'яўляліся яе апорай.

Мы не ведаем, да чаго мы прыйдзем, але пастараемся адрадзіць тое, што наша краіна будавала больш дваццаці гадоў і практычна разбурыла за некалькі месяцаў, палічыўшы, што ў мэтах аптымізацыі сістэмы дзяржаўных органаў і іншых арганізацый разумным з'яўляецца пазбавіць спецыялістаў патэнтнага органа статусу дзяржаўных служачых. Гаворка ідзе пра спецыялістаў, якія прымаюць ад асобы дзяржавы рашэнні аб выдачы ахоўных грамат, якія вырашаюць спрэчкі ў сферы прамысловай уласнасці, якія адказваюць за дзяржаўныя рэестры, якія распрацоўваюць акты заканадаўства, якія прадстаўляюць інтарэсы дзяржавы на міжнароднай арэне, якія выконваюць іншыя, неабходныя менавіта дзяржаве функцыі.

Мы будзем працягваць казаць пра ўнікальнасць беларускай сістэмы інтэлектуальнай уласнасці і людзей, якія яе фармуюць. Іх высокі ўзровень адзначаюць спецыялісты Сусветнай арганізацыі інтэлектуальнай уласнасці, Еўразійскай эканамічнай камісіі, Еўразійскай патэнтнай арганізацыі, замежных патэнтных ведамстваў. Мы губляем наш кадравы патэнцыял, паколькі, аддаўшы многія гады служэнню нашай дзяржаве, спецыялісты патэнтнага ведамства вымушаныя шукаць іншую працу, на іншых дзяржаўных пасадах, у іншых арганізацыях, якія дазволяць ім хаця б захаваць той узровень заработнай платы, які, і так з'яўляючыся невысокім, дазваляў забяспечваць іх сем'і.

Мы накіруем усе нашы сілы на тое, каб ажыццявіць ідэю, у якую мы верым, - ідэю аб высокай каштоўнасці інтэлектуальнай уласнасці. Гэтая ідэя, убіраючыся ў кроў немаўлятаў з малаком маці, дазваляе замежным дзяржавам актыўна развівацца, канкурыраваць на сусветных рынках. Мы ж пакуль сярод адсталых і будзем там заставацца да таго часу, пакуль не захочам адкрыць вочы і прызнаць праўду.

Мы спадзяемся, што ўсе, хто звольніўся 28 чэрвеня 2013 года ў сувязі з адмовай ад працягу працы ў новых умовах, неўзабаве вернуцца. Бо вар'яцтва не можа працягвацца доўга. А ці не вар'яцтва, калі ў арганізацыі не застаецца кіраўніка і тых асоб, якія побач з ім прымаюць патрэбныя дзяржаве рашэнні.

Мы не губляем надзеі. І нам хочацца верыць, што мы ўсё ж такі атрымаем адказ на зварот аб тым, што чакае нацыянальную сістэму інтэлектуальнай уласнасці, які амаль 140 работнікаў патэнтнага ведамства разам з Вамі накіравалі ў Адміністрацыю Прэзідэнта Рэспублікі Беларусь яшчэ 19 красавіка 2013 года.

Калектыў, які з Вамі... »

Нагадаем, Нацыянальны цэнтр інтэлектуальнай уласнасці забяспечвае ахову правоў на аб'екты інтэлектуальнай уласнасці, ажыццяўляе вызначаныя заканадаўствам функцыі патэнтнага органа і падпарадкоўваецца Дзяржаўнаму камітэту па навуцы і тэхналогіях Рэспублікі Беларусь.