Rzeczpospolita: Менск і Масква разыгрываюць сцэнар вайны з Польшчай

Вучэнні «Захад-2013» выклікаюць усё больш боязі ў Варшаве.

Завяршыліся буйнамаштабныя вучэнні расейскага войска на Далёкім Усходзе, якія выклікалі вялікі рэзананс у прэсе. Між тым праверка баявой гатоўнасці ва ўсіх ваенных акругах РФ у беспрэцэдэнтным з савецкіх часоў маштабе працягваецца ўжо шэсць месяцаў. Вучэнні паказваюць, што Расея гатовая без папярэдняй доўгай падрыхтоўкі, гэта значыць практычна незаўважна для ворага, кінуць у бой авіяцыю, ПДВ, флот або нанесці ракетны ўдар. Гэта больш чым недвухсэнсоўны сігнал для Польшчы і яе палітыкі бяспекі, піша «Rzeczpospolita».

Расейскае войска праводзіла манеўры на сушы і на моры непадалёк ад кітайскай мяжы і японскіх выспаў. У вучэннях прыняло ўдзел 160 тысяч ваеннаслужачых, гэта значыць больш, чым усё польскае войска разам з рэзервістамі. Масква заяўляла пра абсалютную празрыстасць і супакойвала, што падобная канцэнтрацыя сіл не накіраваная супраць якой-небудзь краіны. Аднак войскі не рыхтуюцца да ваенных сутыкненняў з цалкам абстрактным праціўнікам, яны заўсёды маюць на ўвазе канкрэтнага ворага, хоць і не называюць яго. Расейскае войска адпрацоўвала сцэнар сухапутнай вайны з Кітаем і паветрана-марскога канфлікту з ЗША і Японіяй. У рамках прызначаных на верасень вучэнняў «Захад» Расея і Беларусь будуць сумесна разыгрываць сцэнар вайны з Польшчай і НАТА. У сваю чаргу польскія ўзброеныя сілы і саюзнікі па Альянсу на вучэннях Seadfast Jazz 2013 пратэстуюць магчымасці абароны Польшчы, Літвы, Латвіі і Эстоніі ў выпадку нападу з боку размешчанай на ўсходзе буйной дзяржавы, якая не з'яўляецца ўдзельнікам НАТА.

Буйныя вучэнні рыхтуюцца не адзін месяц, і інфармацыя пра іх з'яўляецца загадзя, з польскага ж пункту гледжання значна важней звярнуць увагу на «мікраманеўры», якія Масква праводзіць з лютага гэтага года. На іх правяраецца аператыўная гатоўнасць войскаў да неадкладнага ўступлення ва ўзброены канфлікт. Гэтыя праверкі сталі настолькі інтэнсіўнымі, што віцэ-прэм'ер Дзмітрый Рагозін паведаміў пра неабходнасць вылучыць дадатковыя бюджэтныя сродкі на пастаўку ўзбраенняў. Як паведамляе агенцтва ІТАР-ТАСС, з лютага па чэрвень 2013 года адбылося каля дзесяці тысяч рознага роду навучальных ваенных мерапрыемстваў (гэтая лічба не ўключае ў сябе планавых манеўраў). Цэнтр Усходніх даследаванняў піша ў сваім аглядзе, што дадзеныя праверкі паказалі поўную аператыўную гатоўнасць расейскага войска да правядзення ракетнага нападу, абароны ад такога нападу і кароткатэрміновага ваеннага ўварвання з выкарыстаннем сухапутных, паветраных і марскіх сіл. Гэта азначае, што з 2008 года, калі адбыўся напад на Грузію, узброеныя сілы РФ паспелі правесці сур'ёзную працу. Нягледзячы на перамогу тая кампанія не прынесла ім славы: яны лёгка атрымалі верх, хутчэй, дзякуючы слабасці праціўніка, чым ўласнай эфектыўнасці. Праблемы былі з камандаваннем, сувяззю, каардынацыяй дзеянняў сухапутных сіл і авіяцыі, акрамя таго выразнай стала няздольнасць расейскага войска праводзіць дэсантныя аперацыі.

Расея траціць на ваенную сферу ў шэсць разоў больш, чым Польшча, і планамерна ўвасабляе ў жыццё праграму мадэрнізацыі і трансфармацыі свайго войска. Нягледзячы на бюджэтныя праблемы яна не плануе скарачаць абаронныя выдаткі, наадварот: яны будуць расці ў тэмпе, які апераджае рост ВУП.

Ці азначаюць гэтыя дадзеныя ў спалучэнні з беспрэцэдэнтнымі вайсковымі вучэннямі, што Масква збіраецца ваяваць? Неабавязкова. Аднак яна сур'ёзна прымае да ўвагі магчымасць узнікнення ваеннага канфлікту ва ўсё больш нестабільным шматпалярным свеце, і хоча быць да гэтага гатовай.

Варшаве варта дзейнічаць гэтак жа. З трох асноватворных прыкмет моцнай дзяржавы - эфектыўная эканоміка, паспяховая палітыка і працаздольнае войска - у першых двух мы не атрымалі поспех, так што трэба захаваць хоць бы трэці. Войска - гэта не толькі аснова бяспекі, але і эканамічнага развіцця. Адно звязана тут з іншым. Масква выдатна гэта разумее і не збіраецца эканоміць на сваіх узброеных сілах. У такой сітуацыі польскія палітыкі не павінны нават дакранацца да вайсковага бюджэту. Мы давялі паказчык укладанняў у войска да 1,95% ВУП, аднак пры слабым эканамічным росце рэальныя выдаткі могуць застапарыцца на месцы, і, хто ведае, ці не з'явіцца ў выпадку пагаршэння сітуацыі спакуса скараціць ваенныя выдаткі. Асаблівую занепакоенасць выклікаюць чуткі пра будучае скарачэнне бюджэту міністэрства абароны на 3,3 мільярда злотых (каля 1 млрд. даляраў, - заўв.пер.). Між тым ваенныя выдаткі варта было б наадварот павялічваць. Зрэшты, наўрад ці такія ідэі знойдуць падтрымку ў насельніцтва. І вельмі шкада.

Пераклад: Inosmi.ru

Фота: AFP