«Палатка» хоча дабіць прыватны бізнес

(абноўлена - 11:18) «Дэпутаты» прапаноўваюць увесці новы падатак для прадпрымальнікаў.

Пра гэта паведамляе сайт РГА «Перспектыва».

З ініцыятывай увядзення новага падатку выступіў «дэпутат» Віктар Валюшыцкі. Ён аргументаваў яго неабходнасцю павысіць канкурэнтаздольнасць айчыннай прадукцыі. «Дэпутат» прапануе ўраду ўвесці мясцовы падатак з продажаў на тавары, вырабленыя за межамі краін Мытнага саюза. Плацельшчыкамі, на яго думку, павінны стаць «суб'екты рознічнага гандлю, уключаючы індывідуальных прадпрымальнікаў».

«З мэтай павелічэння канкурэнтаздольнасці айчынных тавараў сродкі, атрыманыя ад рэалізацыі мясцовага падатку, мэтазгодна было б накіраваць на пакрыццё датацый ЖКГ канкрэтнага рэгіёну. Сродкі, атрыманыя ад рэалізацыі мясцовага падатку, могуць стаць крыніцай для зняцця нагрузкі перакрыжаванага субсідавання з прамысловых прадпрыемстваў на рознічныя продажы прадукцыі трэціх краін», - лічыць «дэпутат».

Дэпартамент па прадпрымальніцтву Міністэрства эканомікі звярнуўся да прадпрымальніцкіх арганізацый з прапановай выказаць пазіцыю па дадзенай прапанове.

Старшыня «Перспектывы» Анатоль Шумчанка лічыць, што гэта не апошняя прапанова падобнага роду з боку «дэпутатаў». Такое меркаванне ён выказаў у інтэрв'ю сайту charter97.org.

«Уся гэтая сітуацыя выглядае вельмі сумна. І мне здаецца, што дадзеная ініцыятыва зыходзіць ужо не ад імя ўрада. Ён, напэўна, ужо вычарпаў свой ліміт і разумее, што не можа бясконца казаць, што падыме падаткі. А тут мы назіраем цікавы ход, маўляў, «абраннікі народа» клапоцяцца пра яго лёс і просяць падняць падаткі. І, вядома ж, гэта не лезе ні ў якія вароты. Больш за тое хачу сказаць, што тыя аргументы, якія там прыведзеныя, абсалютна бессэнсоўныя. Наогул, з пункту гледжання эканамічнай тэорыі, існуе альбо падатак з продажаў, альбо падатак на дабаўленую вартасць (ПДВ). Іншага няма. А нас хочуць абвешаць падаткамі, як навагоднюю елку ўпрыгожваннямі, каб мы ў гэтай краіне запальвалі і прыгожа спявалі і скакалі. Але так не будзе. Мы, вядома ж, дамо адказ ва ўстаноўленай форме і прывядзем сваім аргументы. Але я думаю, што гэта не апошняя прапанова аб новаўвядзенні з боку так званых «дэпутатаў», і мы ўбачым яшчэ не адну перлу з іх боку. Дарэчы, пра такога «дэпутата» я ніколі не чуў», - заявіў Анатоль Шумчанка.