Лукашэнка назваў сябе «самым разумным і прасунутым»

Дыктатар растлумачыў, чаму ён запрасіў на сустрэчу толькі асобныя СМІ.

Пра гэта Лукашэнка заявіў 21 студзеня ў Палацы Незалежнасці, адкрываючы гэтую сустрэчу, паведамляе БелТА.

«Шчыра скажу: мне даводзіцца праводзіць у такім маштабе мерапрыемствы з журналістамі, але яны мне не вельмі падабаюцца, таму што гэта падобна на нейкую лекцыю, - сказаў Лукашэнка. - Усё-такі ў вузкім коле зацікаўленых і дасведчаных людзей можна больш падрабязна абмеркаваць тыя ці іншыя пытанні, якія сёння хвалююць людзей, і паспрабаваць, калі гэта атрымаецца, зазірнуць у недалёкую будучыню».

Ён таксама патлумачыў, чаму на сустрэчу былі запрошаныя менавіта кіраўнікі асобных СМІ. Паводле яго слоў, галоўным крытэрам быў уплыў і аўтарытэт таго ці іншага СМІ ў грамадстве.

«Калі вызначаліся, я сказаў, што мы павінны глядзець на тое, як народ рэагуе на тое ці іншы сродак масавай інфармацыі. Па многіх крытэрах мы ўбачылі, што гэта вядучыя сродкі масавай інфармацыі Беларусі, падабаецца гэта камусьці ці не, але так атрымалася», - растлумачыў Лукашэнка.

Ад кіраўнікоў СМІ, якія ўдзельнічаюць у сённяшняй сустрэчы, Лукашэнка чакае «адкрытага дыялогу».

«Я гатовы да размовы. Форму гэтай размовы не будзем вызначаць, будзем лічыць, што ў нас сёння адбудзецца дыялог. Вельмі не хацелася б, каб вы задавалі пытанні, а я, як самы разумны і прасунуты, адказваў на вашыя пытанні - гэтага нам трэба пазбегнуць. Давайце пагаворым пра тыя праблемы, якія хвалююць людзей», - рэзюмаваў Лукашэнка.

Нагадаем, дыктатар 21 студзеня сустрэнецца з кіраўнікамі некаторых беларускіх СМІ. Сярод запрошаных - заснавальнік партала TUT.BY Юрый Зісер, старшыня НДТРК Генадзь Давыдзька, гендырэктар СТВ Юрый Казіятка, кіраўнік тэлеканала ОНТ Рыгор Кісель, гендырэктар дзяржаўнага інфармацыйнага агенцтва БелТА Зміцер Жук, кіраўнік прыватнай інфармацыйнай кампаніі БелаПАН Алесь Ліпай, галоўны рэдактар «Советской Белоруссии» Павел Якубовіч, галоўны рэдактар Выдавецкага дома «Звязда» Аляксандр Карлюкевіч, галоўны рэдактар газеты «Прессбол» Уладзімір Беражкоў.

Прамой радыё- і тэлетрансляцыі ў гэты раз не будзе. Тэлеверсія мерапрыемства выйдзе ў эфір у 21.00.