Пратэстоўцы і сілавікі на Грушэўскага заключылі перамір'е
12- 23.01.2014, 13:29
- 6,272
Бакі дамовіліся аб перамір'і да 20.00.
У гэты час, па словах Віталя Клічко, ён зноў прыйдзе да іх і зробіць справаздачу пра вынікі перамоваў лідараў апазіцыі з прэзідэнтам Украіны Віктарам Януковічам.
Як перадае карэспандэнт агенцтва «Інтэрфакс-Украіна», у цяперашні час пратэстоўцы спынілі кідаць камяні ў бок праваахоўнікаў на вуліцы Грушэўскага.
Віталь Клічко падышоў да барыкады на рагу каля вуліцы Грушэўскага, 4 і заклікаў бакі спыніць супрацьстаянне на час перамоваў. «Да васьмі гадзін я вяртаюся да вас і раблю вам справаздачу аб перамовах», - заявіў ён.
Пратэстоўцы і сілавікі пагадзіліся на «гадзіну цішыні» і часовае перамір'е. Абодва бакі паабяцалі не прадпрымаць актыўных дзеянняў на перыяд перамоў: «Да 8 гадзін вечара ніякай атакі не будзе».
Пратэсты ва Украіне працягваюцца ўжо больш за два месяцы. 22 студзеня адбыліся найбольш сур'ёзныя сутыкненні паміж прыхільнікамі апазіцыі і сілавікамі. На вуліцы Грушэўскага ў Кіеве пачалася чарговая жорсткая зачыстка дэманстрантаў. Спецназ і ўнутраныя войскі атакавалі барыкады, збудаваныя прысутнымі. Наступ суправаджаўся стрэламі. Сілавікі выйшлі за лінію згарэлых два дні таму аўтобусаў. Людзі спрабуюць уцячы, аднак міліцыянты іх даганялі і збівалі.
У выніку сутыкненняў, як мінімум, трое чалавек забітыя, некалькі сотняў атрымалі раненні. Дваіх дэманстрантаў, сярод якіх - беларус Міхаіл Жызнеўскі, застрэлілі сілавікі. Адзін з пратэстоўцаў зваліўся з каланады і памёр у рэанімацыі.
Фота: Reuters