Шэйман прыстроіў апальнага прапагандыста Азаранка

Прапагандыст Юрый Азаранок цяпер працуе ва Упраўленні справамі Лукашэнкі.

Яшчэ пяць гадоў таму імя рэжысёра Юрыя Азаранка было ў Беларусі скандальна-намінальным.

Аўтар нашумелых дакументальных фільмаў «Нянавісць: дзеці хлусьні», «Духоўная вайна» мог без перабольшання лічыцца галоўным прапагандыстам дзеючай улады. Якімі злымі эпітэтамі ён толькі не ўзнагароджваў прадстаўнікоў беларускай апазіцыі.

У апошнія гады пра Азаранка нічога не было чуваць. «Народная воля» даведалася, што сёння Юрый Азаранок жыве ціхім жыццём чыноўніка, але па-ранейшаму гатовы па першым клічы ўступіць на шлях ідэалагічных войнаў.

Сёння былы тэлевізійнік працуе ў аддзеле інфармацыі і грамадскіх сувязяў Упраўлення справамі Лукашэнкі. Па асабістым прызнанні, ужо і не ўзгадае, як даўно змяніў камеру на чынавенскі партфель. Хоць яшчэ чатыры гады таму шлях Юрыя Азаранка быў вельмі далёкі ад палітыкі - рэжысёр займаўся праваслаўным тэлепраектам «Крыніца душы». Ад спраў дзяржаўных Азаранок быў адлучаны пасля канфузу на «Еўрабачанні-2008». Скандальны рэжысёр пазбавіўся пасады намесніка старшыні Нацыянальнай дзяржаўнай тэлерадыёкампаніі за «здзяйсненне правіны, несумяшчальнай са знаходжаннем на дзяржаўнай службе».

«Воўчы білет» Азаранок, які ўзначальваў беларускую дэлегацыю на «Еўрабачанні», атрымаў нібыта за тое, што спазніўся на самалёт. Маўляў, моцна знерваваўся з-за пройгрышу нашага выканаўца Руслана Аляхно, злоўжыў гарачыльнымі напоямі і прапусціў рэйс.