Франак Вячорка: Улады хаваюць праўду пра салдата, які ўцёк

Найбольш частай прычынай дэзертырства з'яўляецца дзедаўшчына і прадузятае стаўленне камандавання.

Такое меркаванне сайту charter97.org выказаў журналіст, былы палітсалдат Франак Вячорка, каментуючы знікненне салдата з брыгады спецназу ў Мар'інай Горцы.

«На мой погляд, уся тая інфармацыя, што яго быццам бы знайшлі на дыскатэцы, хлусня. Звычайна гэта робіцца для сыходу ад тэмы і стварэння фіктыўнага ўражання вырашэння праблемы. Таму што ўладам і ваенным камандзірам ніяк не выгадна, каб гэтая сітуацыя нейкім чынам развівалася», - лічыць моладзевы актывіст.

Былы палітсалдат адзначыў, што найбольш частай прычынай наўмыснага або ненаўмыснага дэзертырства з'яўляюцца пазастатутныя адносіны.

«Гэта могуць быць пазастатутныя адносіны не толькі паміж таварышамі па службе, але і паміж камандзірам і гэтым салдатам. Яго маглі, напрыклад, запалохаць. Бо вядома, што ў беларускай арміі таксама ўжываюць разнастайныя псіхалагічныя меры супраць салдат, якія на погляд камандзіра парушылі статут: іх ізалююць і запалохваюць, ім пагражаюць або ствараюць нечалавечыя ўмовы службы. Таксама існуе верагоднасць, што хлопец мае нейкую крымінальную мэту. Але ў любым выпадку відавочна, што ўлады зацікаўленыя сказіць інфармацыю аб зніклым салдаце, а ў грамадскасці ёсць магчымасць праявіць актыўнасць і знайсці хлопца. Тым больш калі ён сышоў са зброяй, гэта пагроза не толькі рэпутацыі лукашэнкаўскай арміі, але і пагроза людзям», - перакананы Франак Вячорка.

Нагадаем, некалькі дзён таму супрацоўнікі праваахоўных органаў звярнуліся па дапамогу ў вышуку салдата з брыгады спецназу ў Мар'інай Горцы.

Завуць спецназаўца Аляксандр Сушчык, 1992 года нараджэння. Згодна з арыенціроўкай у хлопца з сабой ёсць штык-нож і рацыя, апрануты ўцякач ў ваенную форму. Яго рост - амаль 2 метры, асаблівая прыкмета - радзімка на шыі з правага боку.