Абмежаванні на разлікі гатоўкай складуць $14 тысяч
7- 18.10.2014, 13:11
- 14,182
Абмежаванне на разлік гатоўкай пры куплі фізічнай асобай тавараў складзе 1000 базавых велічынь.
Згодна з існуючым курсам гэта каля 14 тысяч даляраў. Пра гэта гаворыцца ва ўказе №493 ад 16 кастрычніка 2014 года, піша АФН.
«Гранічны памер аднаго плацяжу гатоўкай пры правядзенні фізічнай асобай разлікаў, не звязаных з правядзеннем ім прадпрымальніцкай дзейнасці, у аплаце тавараў (работ, паслуг), што рэалізуюцца юрыдычнымі асобамі і індывідуальнымі прадпрымальнікамі, складае 1000 базавых велічынь», - гаворыцца ў дакуменце.
Абмежаванне не распаўсюджваецца на плацяжы фізічных асоб за тавары (работы, паслугі), якія праводзяцца шляхам унясення гатоўкі непасрэдна ў касы банкаў для залічэння на банкаўскія рахункі юрыдычных асоб, індывідуальных прадпрымальнікаў.
Указам зацверджаныя іншыя меры ў стымуляванні безнаяўных разлікаў з выкарыстаннем пластыкавых картак.
«Да 1 студзеня 2017 года не прызнаюцца аб'ектам падаткаабкладання падаходным падаткам з фізічных асоб даходы, што выплачваюцца банкамі-рэзідэнтамі, якія знаходзяцца на тэрыторыі Рэспублікі Беларусь, фізічным асобам у выглядзе адсоткаў ад сумы аплаты тавараў (работ, паслуг) з выкарыстаннем банкаўскіх плацежных картак, сістэм дыстанцыйнага банкаўскага абслугоўвання, але не больш за 2 адсоткі ад сумы такой аплаты, - гаворыцца ва ўказе. - Сумы грашовых сродкаў, выкрадзеныя з рахункаў фізічных асоб, да якіх выпушчаныя ў абарачэнне банкаўскія аплатныя карткі, і затым сплачаныя ім банкамі, не прызнаюцца аб'ектам падаткаабкладання падаходным падаткам з фізічных асоб».
Указ ўвойдзе ў дзеянне праз 6 шэсць месяцаў пасля ягонага афіцыйнага апублікавання.