«Трактар» скасаваў кантракт з Андрэем Касціцыным

Чалябінскі «Трактар» паводле пагаднення бакоў скасаваў кантракт з форвардам зборнай Беларусі.

Кантракт дзейнічаў да канца гэтага сезона, паведамляе БелТА.

8 кастрычніка «Трактар» выставіў Андрэя Касціцына на драфт адмоваў, але беларускага форварда не запрасіла ў свае шэрагі ні адна з каманд КХЛ. Апошнія некалькі дзён форвард знаходзіўся ў размяшчэнні даччынага клуба чалябінцаў «Челмет» (ВХЛ).

У цяперашнім рэгулярным чэмпіянаце КХЛ беларус згуляў за чалябінцаў у 13 матчах, набраў 4 (2+2) балы пры паказчыку карыснасці «-12» і васьмі хвілінах штрафу.

29-гадовы Андрэй Касціцын выступаў за «Трактар» з верасня 2012-га. У сезоне 2012/13 ён выйшаў з ім у фінал Кубка Гагарына, аднак не заваяваў трафей.

Да прыезду ў КХЛ ураджэнец Наваполацка цягам сямі сезонаў гуляў у НХЛ за «Манрэаль» і «Нэшвіл».