Арсень Яцэнюк: У Пуціна задача замарозіць Украіну
23- 21.10.2014, 15:41
- 13,467
Прэм'ер Арсень Яцэнюк мяркуе, што Расея не мае намеру падпісваць прамежкавую газавую дамову з Украінай.
Пра гэта ён заявіў журналістам падчас наведвання Явораўскага палігона ў Львоўскай вобласці ў аўторак, паведамляюць "Подробности".
"Калі дамовы не будзе, то я вам шчыра скажу, я мяркую, што Пуцін не хоча падпісваць ніякай дамовы, задача Пуціна - замарозіць Украіну. І мы павінны быць гатовыя да найгоршага сцэнару", - сказаў ён.
Але са слоў Яцэнюка, урад ужо замарозіў 3,1 млрд даляраў для аплаты за газ, калі Расея ўсё ж пагадзіцца падпісаць дамову.
"Пакуль не будзе падпісаная дамова, пакуль не будзе дакумента, казаць пра якое-небудзь развязанне "газавага пытання" рана. Хоць, ведаючы расейцаў, можна падпісаць дамову, заплаціць, і нічога не атрымаць, ведаю я гэтыя расейскія штучкі", - сказаў Яцэнюк .
Другім варыянтам развязання гэтага пытання прэм'ер назваў вердыкт Стакгольмскага арбітражу аб прамежкавым кошце на расейскі газ для Украіны, які чакаецца ў канцы лістапада.
Яцэнюк адзначыў, што цяпер у сховішчах знаходзіцца 17 млрд куб. м газу, і калі ЕЗ адкрые рэверс, то гэта істотна спросціць праходжанне сезону.
Прэм'ер таксама паведаміў, што ва ўрада ёсць рэзервы нафты, якую можна перапрацаваць на мазут, і такім чынам украінскія ТЭС атрымаюць 200 тысяч тон паліва.
Як паведамлялася, Яцэнюк заявіў, што ва Украіны на рахунках ёсць 3,1 мільярда даляраў, якія яна можа выкарыстоўваць у якасці плацяжоў за прыродны газ.
Пры гэтым Украіна ўсю зіму будзе купляць газ у Расеі па 385 даляраў.
Нагадаем, што міністр энэргетыкі і вугальнай прамысловасці Украіны Юрый Продан заявіў аб адмове Расеі падпісаць прамежкавую пастанову што да газу.
Дадамо, Пуцін заявіў, што Расейская Федэрацыя не мае намеру пастаўляць Украіне газ у пазыку.
Але гатовая пералічыць газавую запазычанасць Кіева з $5,3 мільярдаў да $4,5 мільярда.
Раней прэзідэнт Украіны Пётр Парашэнка заявіў, што на двухбаковай сустрэчы з расейскім прэзідэнтам у Мілане не дасягнулі практычнага развязання газавага пытання.
Але разлічвае развязаць газавае пытанне 21 кастрычніка.