РНБА Украіны: Войскі РФ застаюцца на мяжы
5- 21.10.2014, 15:57
- 9,867
Расейскае войска працягвае канцэнтравацца ля межаў Украіны.
Пра гэта паведаміў прадстаўнік Рады нацыянальнай бяспекі і абароны краіны Андрэй Лысенка, паведамляе «Украінская праўда».
«Мы назіралі за пачаткам руху расейскіх войскаў, якія размяшчаліся ўздоўж украінска-расейскай мяжы на тэрыторыі Расейскай Федэрацыі. Яны быццам бы бралі ўдзел у вайсковых вучэннях. Аднак канстатаваць, што ўсе яны адведзеныя ў месцы асноўнага базавання, мы не можам», - заявіў ён. «Большасць з іх застаецца на месцы», - адзначыў Лысенка.
Нагадаем, што ў суботу ўвечары, 11 кастрычніка, прэс-служба Крамля паведаміла, што Пуцін даручыў Міністэрству абароны пачаць вяртанне ў месцы пастаяннай дыслакацыі 17 тысяч 600 вайскоўцаў, якія, паводле афіцыйнай версіі, з лета праводзілі вучэнні на палігонах у Растоўскай вобласці.
Раней расейскі прэзідэнт ужо аддаваў падобныя загады ў сакавіку і траўні гэтага года, аднак NАТO абодва разы заяўляла аб захаванні падвышанай канцэнтрацыі расейскіх войскаў уздоўж украінска-расейскай мяжы.
Раней украінская памежная служба зняпраўдзіла заявы аб адводзе войскаў.
Архіўнае фота progorodnn.ru