Парашэнка дазволіў завочна судзіць Януковіча
7- 21.10.2014, 18:23
- 11,055
Прэзідэнт Украіны зацвердзіў закон, які дазволіць судзіць Віктара Януковіча.
Пра гэта Пётр Парашэнка напісаў на сваёй старонцы ў «Твітэры».
Підписав закон, який дозволить провести суд над Януковичем. pic.twitter.com/kNHyPFkI4N
— Петро Порошенко (@poroshenko) 21 октября 2014
Гаворка ідзе пра закон, які прадугледжвае спецыяльную крымінальную вытворчасць за злачынствы ў сферы нацыянальнай бяспекі, які нядаўна быў прыняты Вярхоўнай Радай. Ён дазваляе праводзіць завочныя судовыя працэсы, піша РБК-Украіна.
Закон уяўляе сабой папраўкі ў Крымінальны і Крымінальна-працэсуальны кодэксы. Ён распаўсюджваецца ў тым ліку на злачынствы, у якіх абвінавачваюць Віктара Януковіча, які пакінуў краіну пасля «рэвалюцыі» ў пачатку 2014 года. Гаворка ідзе пра артыкул 109 КК («Дзеянні, накіраваныя на гвалтоўнае змяненне канстытуцыйнага ладу альбо захоп дзяржаўнай улады»), а таксама артыкул 115 («Наўмыснае забойства»). Паводле гэтых артыкулаў на Януковіча былі заведзеныя крымінальныя справы.
Папраўкі прадугледжваюць, што ў дачыненні да чалавека, які абвінавачваецца ў злачынствах супраць асноў нацыянальнай бяспекі, грамадскай бяспекі, а таксама ў карупцыі (і пры гэтым які хаваецца за межамі Украіны), можа быць праведзенае спецыяльнае дасудовае расследаванне, а ў далейшым - і завочная судовая вытворчасць.