Новыя санкцыі ЗША удараць па расейскай металургіі
29- 22.10.2014, 7:59
- 26,515
ЗША разрываюць пагадненне аб бязмытным імпарце сталі з РФ.
Пра гэта сказана ў апублікаваным напярэдадні лісце Міністэрства гандлю краіны да расейскіх уладаў, паведамляе OnPress.info.
Ведамства ў якасці новых санкцыяў прыняло пастанову разарваць пагадненне, падпісанае 15 гадоў таму, якое дазваляла Расеі імпартаваць сваю сталь без пошлін. У лісце сказана, што дакумент страціць сваю сілу праз 60 дзён і паведамляецца, што «пасля спынення дзеяння гэтага Пагаднення, прымяняюцца палажэнні Закона ЗША аб антыдэмпінгавай пошліне».
Ідэя скасаваць так званае Пагадненне аб прыпыненні антыдэмпінгавых расследаванняў ад 1999 года ўкладаецца ў логіку ўзмацнення жорсткасці пазіцыі амерыканскай адміністрацыі ў дачыненні да Расеі пасля росту напружанасці паміж краінамі вакол Украіны, якія, у прыватнасці, выліліся ў скасаванне гандлёвых ільгот для Расеі.
Пагадненне дазваляла расейскім сталёвым кампаніям пазбягаць вялікіх антыдэмпінгавых пошлін на гарачакачаны пракат. Замест пошлін, ЗША ўстанавілі квоту і ніжнюю мяжу коштаў.
Калі пагадненне 1999 будзе скасаванае, да Северсталі будзе прымяняцца пошліна ў 73,59 адсотка. Наваліпецкаму металургічнаму камбінату і Магнітагорскаму металургічнаму камбінату пагражаюць пошліны ў 184,56 адсоткі.