Прафсаюзны рай генерала КДБ

Генерал-маёр Станіслаў Князеў зачысціў прафсаюзны ВНУ пад сябе.

У рэдакцыю charter97.org звярнуўся чытач з просьбай распавесці аб працы рэктара Міжнароднага ўніверсітэта «МІПСА» (былая Вышэйшая школа прафсаюзаў) Станіслава Князева. Ліст ананімны і, відавочна, напісаны чалавекам, які беспасярэдне ўдзельнічаў у канфлікце з рэктарам.

З тэксту ліста можна зрабіць выснову, што былы кадэбэшнік зачышчае ВНУ ад людзей, блізкіх да былога старшыні ФПБ Леаніда Козіка. Рэдакцыя не збіраецца прымаць чыйсьці бок, але вытрымкі з ліста мы ўсё ж апублікуем. Некаторыя дэталі і падрабязнасці жыцця беларускіх чыноўнікаў будуць цікавыя не толькі нам, але і нашым чытачам.

Пасьля адстаўкі старшыні ФПБ Козіка з МІПСА былі звольненыя дырэктарка вучэбнай работы Марына Аляксеева, начальніца службы аўдыту Таццяна Каўко, «на чарзе яшчэ некалькі чалавек». Не вытрымаў ціску першы прарэктар і па сумяшчальніцтве сын былога кіраўніка ФПБ Андрэй Леанідавіч Козік. Учора ён напісаў заяву аб сыходзе.

На думку аўтара ліста, «гэтыя людзі стварылі такую сістэму, якая не дазваляла аднаасобна расходаваць грошы».

«Па статуце рэктар мог распараджацца фінансавымі рэсурсамі толькі пасля адабрэння артыкулаў расходаў бюджэтнай камісіяй універсітэта. Князеў палічыў, што грашыма павінен кіраваць ён аднаасобна. Нязгодных звальняюць», - тлумачыць прычыны зачысткі аўтар ліста.

«[Князеў] прыцягвае да працы цёмных асобаў, якія і раней круціліся каля грошай іншых арганізацый. Пры такім падыходзе ўніверсітэт апынецца на мяжы разбурэння», - робіць выснову аўтар ліста.

На думку работнікаў МІПСА, генерал-маёр КДБ робіць усё гэта толькі з адной мэтай - «атрыманне асабістых высокіх даходаў». Адстаўнога кадэбэшніка можна зразумець - акрамя персанальнай генеральскай пенсіі на пасадзе рэктара ён атрымліваў у 2013 годзе блізу 46 мільёнаў беларускіх рублёў у месяц (больш за 4,5 тысяч даляраў). У 2014 годзе сярэдні заробак рэктара сладаў 43 мільёны.

«Відаць, такога заробку яму мала, - абураецца аўтар ліста. - Чым такое жыццё - не рай для генерала? Цікава, хто яшчэ ў краіне столькі атрымлівае і за якую працу? Заробак рэктар зацвярджае сабе сам. Ну і здавалася б, сядзеў сабе з заробкам у 46 мільёнаў, як хан, але, напэўна, яму захацелася быць не ханам, а царом».

Нагадаем, у свой час генерал-маёр Станіслаў Князеў быў адным з самых уплывовых людзей у краіне: узначальваў упраўленне вайсковай контрразведкі КДБ Беларусі, быў першым намеснікам дзяржсакратара Савета бяспекі, першым намеснікам кіраўніка адміністрацыі прэзідэнта, рэктарам Акадэміі кіравання пры прэзідэнце. З 3 верасня 2011 года - рэктар Міжнароднага ўніверсітэта «МІПСА».