Алесь Бяляцкі сустрэўся з кіраўніком МЗС Швецыі
2- 23.10.2014, 19:00
- 5,123
Праваабаронца і былы палітвязень заклікаў урад Швецыі не мяняць сваю пазіцыю ў дачыненні да беларускіх улад.
Падчас рабочага візіту ў Швецыю, старшыня ПЦ «Вясна» і віцэ-прэзідэнт Міжнароднай федэрацыі за правы чалавека (FIDH) Алесь Бяляцкі 23 кастрычніка сустрэўся з міністрам замежных спраў Швецыі Маргот Вальстрэм. «Вясна» звязалася з праваабаронцам праз тэлефон, каб пачуць з першых вуснаў пра ягоныя ўражанні ад высокай сустрэчы:
«Сёння ў мяне адбылася сустрэча з міністрам замежных спраў Швецыі спадарыняй Маргот Вальстрэм. У свабоднай і нязмушанай атмасферы я падзяліўся з ёй сваімі думкамі і назіраннямі аб унутранай сітуацыі ў Беларусі. Падчас размовы таксама былі абмеркаваны некаторыя аспекты, якія датычацца беларуска-расейска-украінскіх адносін».
Алесь Бяляцкі заклікаў урад Швецыі не мяняць сваю пазіцыю ў дачыненні да беларускіх улад і па-ранейшаму патрабаваць вызвалення палітычных зняволеных, а таксама аказваць падтрымку грамадзянскай супольнасці Беларусі.
Маргот Вальстрэм шчыра цікавілася думкамі праваабаронцы аб сённяшняй сітуацыі ў Беларусі. На заканчэнне сустрэчы палітык пацвердзіла, што пазіцыя Швецыі ў дачыненні да Беларусі будзе нязменнай і прынцыповай.
