28 сакавiка 2024, Чацвер, 22:13
Падтрымайце
сайт
Сім сім,
Хартыя 97!
Рубрыкі

«Жыццё ў праўдзе» Вацлава Гавела выйшла па-беларуску

У Менску прайшла прэзентацыя кнігі былога прэзідэнта Чэхіі Вацлава Гавела «Жыццё ў праўдзе».

На прэзентацыю кнігі «Жыццё ў праўдзе» прыйшлі і палітыкі, і пісьменнікі, а таксама прадстаўнікі амбасады Чэшскай Рэспублікі ў Беларусі, паведамляе «Радыё Свабода».

«Жыццё ў праўдзе» - кніга, куды ўвайшлі сем сусветна вядомых праграмных эсэ Вацлава Гавела пары ягонага дысідэнцтва ў камуністычнай Чэхаславакіі, а таксама сем выступленняў часоў ягонага прэзідэнцтва. Акрамя гэтага, у кнігу ўключаная дэкларацыя «Хартыі-77», да стварэння якой Гавэл меў непасрэднае дачыненне.

Пераклад кнігі на беларускую мову зрабілі Сяргей Сматрычэнка і Юлія Сматрычэнка, прадмову напісаў Лявон Баршчэўскі.

У выступе падчас мерапрыемства, амбасадар Чэхіі ў Беларусі Мілан Экерт сказаў, што праз гэтую кнігу беларускія чытачы змогуць лепш зведаць унутраны свет Вацлава Гавела, вобраз ягонага мыслення, а таксама даведацца больш пра тыя падзеі, якія адбываліся ў былой Чэхаславакіі.

Чым тэксты Гавела цікавыя для беларусаў? Не толькі тым, што гэта выдатны палітык і драматург. Гавел - чалавек, які быў вельмі блізкі і неабыякавы да Беларусі. Для яго Беларусь не была абстрактнай краінай. Вацлаў Гавел спрыяў знаходжанню ў Чэхіі Васіля Быкава. Ён быў адным з апекуноў Свабоднага тэатра. Уласнаручна пісаў лісты беларускім палітвязням - Алесю Бяляцкаму і Андрэю Санікаву.

Акрамя таго, гэтая кніга цікавая тым, што яна вельмі актуальная і для сучаснай Беларусі. Выдаўцы кнігі, рэдактары, перакладчыкі, якія выступалі падчас мерапрыемства, падкрэслівалі ў кожным слове: кніга Гавела - ілюстрацыя сённяшняга дня Беларусі.

Беларусам кніга цікавая тым, што яна дае надзею. Тыя працэсы, якія адбываюцца ў Беларусі, ужо прайшлі ў іншых краінах Еўропы, і як бы цяжка ні было перажываць часы таталітарызму, дыктатуры - прыклад Чэхіі, прыклад Гавела даюць надзею на лепшае, на тое, што часы неўзабаве зменяцца.

Кніга будзе цікавая і палітыкам, якім трэба будзе прачытаць яе, каб бачыць прыклад - як можна змагацца з любымі рэжымамі.

У завяршэнне мерапрыемства адбылося мастацкае чытанне аднаго з твораў Гавела. Прыемнай нечаканасцю для тых, хто прыйшоў на прэзентацыю, было тое, што кожны атрымаў кнігу Вацлава Гавела ў падарунак.

Кніга Вацлава Гавела «Жыццё ў праўдзе» выйшла ў выдавецтве «Логвінаў», яе можна свабодна набыць у аднайменнай краме.

Напісаць каментар

Таксама сачыце за акаўнтамі Charter97.org у сацыяльных сетках