Пенсіянерка з Гародні спыніла будаўніцтва шасціпалоснай дарогі

Жыхарка абласнога цэнтра Людміла Яцук не можа вызначыцца, дзе яна павінна жыць.

Яе выселілі з кватэры на Гродзенскай вуліцы, 8, так як дом ідзе пад знос, а ў новую прапісаць не могуць. Выявілася, жанчына не хоча дзяліць новую кватэру з былым мужам. Пакуль сітуацыя не вырашыцца, дом не знясуць, а будаўніцтва шасціпалоснай магістралі ў Фабрычным будзе стаяць, піша «Вячэрні Гародня».

Дом акружыла будоўля

Чатыры месяцы таму пенсіянерка Людміла Яцук пераехала з Фабрычнага ў новую кватэру. Яе дом на Гродзенскай вуліцы, 8, у якім яна пражыла больш за 25 гадоў, хочуць знесці. У гэтым месцы павінна прайсці шасціпалосная магістраль, якая злучыць мікрараён Альшанку і аб'язное кольца. Замест «двушкі» плошчай 30,1 кв. м у доме без выгод жанчына атрымала аднапакаёвую на Пестрака, 34а плошчай амаль 43 «квадраты».

- Нядаўна ў ЖЭС мне сказалі, што я жыву тут незаконна і павінна з'ехаць назад, - наракае Людміла Яцук.

Справа ў тым, што жанчына разам з былым мужам зарэгістраваная на старым адрасе ў Фабрычным, а жыве на Пестрака.

Зараз аднапавярховы дом з пячным ацяпленнем на шэсць кватэр на Гродзенскай вуліцы з усіх бакоў акружае вялікая будоўля. Дом у паўразбураным стане, дзе-нідзе выбітыя вокны, адчыненыя дзверы. Камунікацыі адключаныя. Але пакуль тут ёсць зарэгістраваныя жыхары, зносіць яго не будуць.

Каб прапісацца, трэба падзяліць кватэру

Выявілася, прапішуць Людмілу Іванаўну на новым адрасе толькі з былым мужам. Кватэру ў доме на Гродзенскай, 8 яны прыватызавалі разам у 1996 годзе. Трэба вылучыць у старой кватэры ягоную долю ўласнасці і ў адпаведнасці з гэтым падзяліць новую. Але пенсіянерка рабіць гэтага не хоча, спасылаючыся на тое, што экс-муж жыве ў Гомельскай вобласці, - пакуль сын быў жывы, прыязджаў сюды зрэдку, а зараз рабіць яму тут няма чаго.

- Дзелі маёмасці ўсё роўна выдзеляць альбо ў добраахвотным парадку, альбо ў прымусовым - праз суд. Калі Людміла Іванаўна дасць сваю згоду, будзе арганізаваная сустрэча з натарыусам і ў БТІ. У адваротным выпадку жанчыне, як адказчыку, прыйдзецца заплаціць немаленькую дзяржпошліну, - растлумачыў намеснік начальніка аддзела жыллёва-камунальнай гаспадаркі гарвыканкама Аляксандр Хаменя.

У выпадку з падзелам кватэры сума дзяржпошліны складае 5% ад яе кошту, растлумачыў старэйшы памочнік пракурора Гарадзенскай вобласці Вячаслаў Ігнацік. Паколькі кватэру на Гродзенскай, 8 ацанілі ў 20 тысяч даляраў, сума абавязковага плацяжу складзе 1000 даляраў.

Выдзяляць дзелі ў старой кватэры Людміла Іванаўна не хоча і лічыць, што ім павінны былі даць дзве кватэры.

Згодна з артыкулам 158 Жыллёвага кодэкса, наўзамен жылля, якое зносяць, уласніку даецца кватэра тыпавых спажывецкіх якасцей, агульная плошча якой павінна быць не менш за 15 кв. м на кожнага зарэгістраванага чальца сям'і.

- Калі ўласнікаў некалькі, гэта не значыць, што кожнаму дадуць па кватэры. Калі жанчына не згодная, яна можа напісаць заяву на атрыманне «двушкі», але не дзвюх кватэр. Ніякай заявы ад яе пакуль не паступала, - растлумачыў Аляксандр Хаменя.

Паводле праекту новая дарога, якая звяжа Альшанку і аб'язное кольца, будзе шасціпалоснай з раздзяляльным газонам шырынёй 5 метраў паміж сустрэчнымі патокамі. Яна пачынаецца ў месцы скрыжавання з вуліцай Альшанскай, ідзе ўздоўж пасёлка Фабрычнага, па вуліцы Гродзенскай, далей міма дзейнай капліцы, перасякае чыгунку і выходзіць на вуліцу Славінскага каля «Хімвалакна», распавяла галоўны архітэктар праекта з інстытута "Гроднаграмадзянпраект" Таццяна Бутакова. У раёне перасячэння новай вуліцы з аб'язной з'явіцца двухузроўневая развязка і два падземных пешаходных пераходы. Яшчэ чатыры наземныя пешаходныя пераходы абсталююць святлафорамі. Чыгуначныя шляхі, якія вядуць да баз «Хімвалакна», возьмуць у тунэль. Працягласць ўсёй дарогі складзе амаль 2,5 кіламетра. З абодвух бакоў магістралі зробяць тратуары, з аднаго (дзе агароднінная база) будзе веладарожка шырынёй тры метры. Каб пабудаваць новую дарогу, прыйшлося знесці дзясяткі дрэў і некалькі дамоў.