70 байкераў праехалі па вуліцах Магілёва
- 25.10.2014, 18:07
- 7,523
Байкеры з розных гарадоў Беларусі ўзялі ўдзел 25 кастрычніка ў закрыцці мотасезона.
Як распавёў кіраўнік магілёўскага аддзялення клуба матацыклістаў Desperados MC Ігар Кудзін, цяперашняе закрыццё мотасезона прысвечанае памяці загінулага 16 кастрычніка ў Магілёве байкера Васіля Барчана. Менавіта таму на многіх матацыклах былі павязаныя жалобныя стужачкі, піша БелаПАН.
«У гонар трагічна загінулага Васіля мы прымеркавалі закрыццё мотасезона. Сёння наведаем могілкі, дзе ён пахаваны», - сказаў Кудзін. Шлях калоны матацыклістаў, пачаўшыся каля супермаркета «Гіпа», праходзіў па вуліцах і ваколіцам Магілёва з выездам на Бабруйскую шашу і завяршыўся ля Святога возера.
Сюды з'ехаліся байкеры з розных гарадоў Беларусі, распавёў лідар клуба матацыклістаў Desperados MC Канстанцін (Аэрадром) Дзяркач, які прыехаў з Менска. З ягоных слоў, сёння мотарух у рэспубліцы «вырас да вялікіх маштабаў» - у яго ўваходзяць як байкеры, аб'яднаныя ў клубы, так і «свабодныя матацыклісты».
«У Беларусі каля 10 клубаў. Частка з іх - аддзяленні расейскіх клубаў, але больш за палову - карэнныя беларускія клубы», - сказаў лідар Desperados MC.
Ён паведаміў, што закрыццё мотасезона прайшло ўжо практычна ва ўсіх гарадах Беларусі, і Магілёў, мабыць, стаў апошнім, які праводзіць гэтае мерапрыемства. Аднак ужо на канец лістапада ў Лідскім раёне запланаваны мотазлёт «Буралом», дзе матацыклісты праедуць на спецыяльна абранай трасе па перасечанай мясцовасці.
Фота з архіву