Прадстаўніцы палітычных партый аб'ядноўваюцца ў «Жаночую сетку»
8- 28.10.2014, 12:28
- 5,764
У Менску актывісткі шэрагу апазіцыйных партый і грамадскіх аб'яднанняў падпісалі дэкларацыю аб стварэнні «Жаночай сеткі».
Аргкамітэт зоймецца падрыхтоўкай устаноўчага сходу, які запланавана на ліпень 2015 года, паведамляе «Радыё Свабода».
Аб'яднацца вырашылі прадстаўніцы Партыі БНФ, Беларускай сацыял-дэмакратычнай партыі (Грамада), Маладых сацыял-дэмакратаў - Маладая грамада, партыі «Справядлівы свет» і Цэнтра рэгіянальнага развіцця з Гомеля.
Галоўная мэта аб'яднання - абмен досведам і інфармацыяй, а таксама салідарнасць паміж жанчынамі з актыўнай грамадзянскай пазіцыяй.
Адна з ініцыятараў стварэння «Жаночай Сеткі», намеснік старшыні Партыі БНФ Вольга Лагвіновіч кажа, што адрозненні ў палітычных пазіцыях не перашкодзілі ім аб'яднацца. Аднак выходзіць з сваіх партый прадстаўнікі «Жаночай сеткі» не збіраюцца. «Мы б хацелі таксама, каб да нас прыходзілі жанчыны, якія не ўваходзяць у партыі і арганізацыі, але хочуць дзейнічаць у сферы прыняцця пастаноў. Напрыклад, балатавацца ў органы ўлады», - дадала Вольга Лагвіновіч.