Арсень Яцэнюк: Украіна будзе купляць расейскі газ з папярэдняй аплаты

Кошт расейскага газу будзе прывязаны да кошту нафты.

Украіна настойвае на прывязцы кошту расейскага газу да кошту нафты - $378 да канца года і $365 - у першым квартале 2015 года. Пра гэта паведаміў сёння прэм'ер-міністр краіны Арсень Яцэнюк, адкрываючы пасяджэнне ўрада, паведамляе ЛІГАБізнэсІнфарм.

"Пастаўкі новых аб'ёмаў газу робяцца неадкладна Расеяй з папярэдняй аплаты, сапраўды гэтак жа, як мы купляем газ у Еўропе, у аб'ёмах, якія вызначае Украіна. Калі Украіна робіць папярэднюю аплату, то Расея абавязаная паставіць прыродны газ. Таму мяне здзіўляе пытанне расейцаў з нагоды фінансавых гарантый у папярэдняй аплаце. Ёсць грошы - яны паставілі. Мы не заплацілі - яны газ не паставілі. Прынцып даволі просты. Можна нават зразумець, калі кажуць на ўкраінскай мове для расейцаў", - сказаў ён.

Каментуючы пытанне коштаў, Яцэнюк адзначыў, што базавы падыход, абвешчаны Украінай яшчэ 4,5 месяца таму, - у летні сезон газ каштуе $325, у зімовы перыяд кошт $385. "Цяпер мы дайшлі да пазіцыі, дзе цана будзе вызначацца паводле формулы, якая ёсць непасрэдна ў кантракце, на якую ўплывае кошт нафты, цана на якую істотна ўпала. Гэта азначае, што ў апошнім квартале гэтага года цана будзе $378, а ў першым квартале наступнага года - на ўзроўні $365", - падкрэсліў ён.

Яцэнюк дадаў, што Украіну наогул не цікавіць, якім чынам Расея будзе прымаць пастанову ва ўсталяванні справядлівага кошту на экспартны расейскі падатак. Падыход што да цэнаўтварэння зафіксаваны ў пратаколе. "Калі Расея парушыць парадак цэнаўтварэння і зноў запатрабуе кошт у $500, то мы з Еўрапейскай камісіяй дасягнулі згоды, што Еўрапейская камісія будзе выступаць фактычна гарантам выканання абавязацельстваў Расеі што да справядлівай цаны, у тым ліку і праз механізм кампенсацыі павышэння цаны, калі такая цана не будзе адказваць трохбаковаму пратаколу, падпісанаму паміж Еўрапейскім Звязам, Украінай і Расеяй", - адзначыў ён.