Тозік: Навучальны год у школах Беларусі занадта кароткі

Віцэ-прэм'ер знайшоў прычыну дрэннай якасці ведаў беларускіх школьнікаў.

На ягоную думку, навучальны год у агульнаадукацыйных школах краіны доўжыцца істотна менш, чым у іншых краінах. Пра гэта Анатоль Тозік заявіў на пасяджэнні прэзідыума Савета міністраў Беларусі, дзе разглядалася выніковая справаздача створанай у краіне на даручэнне прэзідэнта рабочай групай для комплекснага аналізу сістэмы адукацыі, паведамляе «Інтэрфакс».

Тозік паведаміў, што пры вяртанні да 11-гадовага тэрміну навучання і захаванні пяцідзённага працоўнага тыдня ў школах Беларусь апынулася ў велізарным адрыве ў колькасці навучальных дзён у навучальным годзе ад краін, якія ўважаюцца лепшымі ў міжнародных рэйтынгах па якасці школьнай адукацыі.

«У нас 170-173 навучальныя дні ў годзе, у той час як у краінах Заходняй Еўропы (Нямеччына, Францыя) - 230, у краінах Паўднёва-Усходняй Азіі (Японія, Карэя, Кітай) – 260», - сказаў віцэ-прэм'ер.

Ён падкрэсліў, што гэты разрыў становіцца яшчэ больш істотным і небяспечным, калі ўлічваць, што ў гэтых краінах навучанне ў школах доўжыцца 12-13 гадоў, а колькасць вучэбных гадзін у тыдзень большая, чым у Беларусі.

Тозік дадаў, што найбольшая колькасць праблемных пытанняў рабочай групай была выяўлена менавіта ў сістэме агульнаадукацыйнай школы. «Асноўныя з іх - гэта зніжэнне ўзроўню і якасці агульнаадукацыйнай падрыхтоўкі навучэнцаў, нізкі прэстыж прафесіі настаўніка, зарэгламентаванасць работы школы, нізкая матывацыя вучняў да вучобы, інэртнасць і пазіцыя старонніх назіральнікаў у іх бацькоў», - сказаў віцэ-прэм'ер.

Нагадаем, апошнім часам віцэ-прэм'ер Анатоль Тозік зрабіў некалькі гучных заяваў на тэму рэфармавання сістэмы адукацыі. Сярод іх прагучала і прапанова ўвесці санкцыі супраць бацькоў, чые дзеці адсутнічаюць у дзіцячых садках без уважлівых прычын.