Сенатараў РФ таксама папросяць здаць дыппашпарты

Бліжэйшымі днямі сябрам Савета Федэрацыі афіцыйна будзе загадана здаць на захоўванне свае дыпламатычныя пашпарты.

Менш за тыдзень таму аналагічны крок быў зроблены ў дачыненні да дэпутатаў Дзярждумы.

Апарат Савета Федэрацыі вусна паведаміў сенатарам аб здачы дыпламатычных пашпартоў на захоўванне. Пра гэта паведамляюць «Ведомости» са спасылкай на двух суразмоўцаў у верхняй палаце парламента.

Як заявіў выданню кіраўнік камітэта Савета Федэрацыі па рэгламенце Вадзім Цюльпанаў, у яго няма інфармацыі аб падрыхтаваным распараджэнні спікера Савфеда Валянціны Мацвіенкі з нагоды здачы пашпартоў.

Нагадаем, 27 кастрычніка да дэпутатаў Дзярждумы звярнуўся спікер Сяргей Нарышкін, запатрабаваўшы вярнуць дыпламатычныя пашпарты да 31 кастрычніка і ў далейшым забяспечыць строгае захаванне рэжыму іх выдачы і здачы. Як адзначаецца ў звароце спікера да кіраўнікоў парламенцкіх фракцый, дэпутаты парушаюць парадак атрымання, выкарыстання і здачы пашпартоў - гэта можа пацягнуць «непрадказальныя наступствы» ва ўмовах пагаршэння стасункаў з заходнімі краінамі.

Дэпутаты павінны здаваць дыпламатычныя пашпарты цягам трох рабочых дзён пасля вяртання з замежных службовых паездак. Дакумент выдаецца на падставе пісьмовай заявы дэпутата на імя спікера або пры наяўнасці распараджэння спікера. На практыцы многія дэпутаты не здавалі дыпламатычныя пашпарты.

Дыпламатычныя пашпарты даюць права бязвізавага ўезду на тэрыторыю шэрагу дзяржаў, у прыватнасці ў краіны Шэнгенскага пагаднення.