Дашкевіч: Злачынец павінен знаходзіцца ў «чорным спісе», пакуль не будзе пакараны

Калі сёння чалавек пераследуе апазіцыю, а заўтра мяняе працу - гэта не анулюе ягоную віну.

Былы палітвязень, сустаршыня «Маладога фронту» Зміцер Дашкевіч выказаў charter97.org сваё абурэнне пераглядам спісу персон «нон-грата» ў Еўрапейскім звязе, з прычыны чаго адтуль былі выключаныя 24 фізічных і 7 юрыдычных асоб, у тым ліку суддзя, якая не гледзячы судзіла актывістаў апазіцыі, уключаючы яго самога.

- Трэба сказаць, што падобныя дзеянні еўрачыноўнікаў даводзілася каментаваць ужо неаднаразова. Кагосьці дадаюць, кагосьці, з незразумелых прычын, выключаюць. Праблема ў тым, што няма зразумелых і даступных нам механізмаў, няма структур, у якія можна было б звярнуцца і пазнаць рэальныя прычыны выключэння людзей з санкцыйнага спісу альбо прапанаваць ім кандыдата, які ўдзельнічаў у рэпрэсіях.

- Як вы думаеце, чаму з спісу была выключаная суддзя, якая ў свой час судзіла і вас асабіста? Чым яна заслужыла прабачэнне?

- Што тычыцца гэтага апошняга перагляду спісаў, у прыватнасці, кажучы пра суддзю Рэлява, якая мяне судзіла, то праваабаронцы разам з журналістамі знайшлі пра яе цікавую, даволі сімвалічную інфармацыю: чалавек, які судзіў «пачкамі» дэмакратычных актывістаў, толькі год не з'яўляецца суддзёй, зараз яна стала памочнікам галоўнага суддзі Савецкага раёна Менска. Тут жа злачынец перастае быць злачынцам. Гэта нейкая абсурдная сітуацыя. Я нават не ведаю, як гэта каментаваць, такое здараецца ўжо не першы раз.

- Якія ўмовы, якіх павінны прытрымлівацца еўрачыноўнікі ў дачыненні да беларускіх улад?

- Маё меркаванне такое: калі той ці іншы суддзя з'яўляецца злачынцам - судзіў нявінных людзей і забіраў у іх гады жыцця, і Еўрапейскі суд з маральных перакананняў вырашыў накласці на гэтага чалавека санкцыі - ён павінен знаходзіцца ў гэтым спісе да той пары, пакуль ён не панясе пакаранне ў адпаведнасці з беларускім, а калі трэба, і еўрапейскім заканадаўствам. Інакш гэта вельмі дурная сітуацыя: сёння чалавек саджае або збівае нявінных людзей, а заўтра ён змяніў працу - і ўжо невінаваты. Навошта тады наогул гэтыя спісы? Можа прапанаваць Еўразвязу ўвогуле скасаваць гэтыя спісы і не ладзіць цырк, таму што глядзіцца гэта глупствам. А наогул, гэта проста абуральна.