Генеральны сакратар НАТА: Расея прадаўжае дэстабілізаваць сітуацыю ва Украіне
5- 31.10.2014, 21:32
- 6,974
Падтрымліваючы выбары на Данбасе, РФ прадаўжае прыкладаць намаганні ў дэстабілізацыі сітуацыі ва Украіне.
Запланаваныя на 2 лістапада выбары на Данбасе падрываюць намаганні, накіраваныя на ўрэгуляванне канфлікту ва Усходняй Украіне, тады як Расея прадаўжае дэстабілізаваць сітуацыю ў краіне, заявіў генеральны сакратар НАТА Енс Столтэнберг, піша "Карэспандэнт".
"Яны (выбары, - Рэд.) парушаюць украінскія законы і наўпрост супярэчаць Менскім пагадненням, падпісаным, у тым ліку, дзвюма самаабвешчанымі "рэспублікамі" і Расейскай Федэрацыяй", - цытуе Сталтэнберга прэс-служба альянсу.
"Заявы расейскіх чыноўнікаў адносна прызнання Расеяй гэтых так званых "выбараў" дэманструюць, што Расея прадаўжае прыкладаць намаганні ў дэстабілізацыі сітуацыі ва Украіне. Саюзнікі НАТА ў рамках шырокай міжнароднай супольнасці далі ясна зразумець, што яны не будуць прызнаваць так званыя сепаратысцкія выбары", - падкрэсліў генеральны сакратар.
НАТА цалкам падтрымлівае суверэнітэт і тэрытарыяльную цэласнасць Украіны, нагадаў Столтэнберг. "Я заклікаю Расею паважаць свае абавязацельствы ў адпаведнасці Менскім дамовам, якія маглі б дапамагчы пракласці шлях да мірнага ўрэгулявання", - дадаў генеральны сакратар.
Нагадаем, сёння з аналагічнай заявай выступіла канцлер Нямеччыны Ангела Меркель. Яна сказала прэзідэнту Расеі Уладзіміру Пуціну, што запланаваныя на 2 лістапада выбары ва ўсходняй Украіне з'яўляюцца нелегітымнымі і не будуць прызнаныя еўрапейскімі лідарамі. ЗША таксама лічаць незаконнымі выбары сепаратыстаў на Данбасе.
Раней прэзідэнт Украіны Пётр Парашэнка заявіў, што псеўдавыбары ў самаабвешчаных "рэспубліках" ставяць пад пагрозу ўвесь мірны працэс на Данбасе.
У сваю чаргу, кіраўнік МЗС Расеі Сяргей Лаўроў заявіў, Масква плануе прызнаць выбары, якія арганізуюць сепаратысты ў Данецкай і Луганскай абласцях.