Трагедыя на вуліцы Гая: Андрэй і Юля любілі адзін аднаго са школы

Яны трагічна загінулі ў адзін дзень у жудасным ДТЗ на вуліцы Гая ў Менску.

Аварыю зладзіў звар'яцелы 38-гадовы бізнэсовец, нагадвае «Комсомольская правда в Беларуси».

- Нам так складана цяпер казаць... Дайце час прыйсці ў сябе і ўсвядоміць увесь гэты жах. Прынамсі ўсё калегі Андрэя збіраюцца правесці яго з жонкай у апошні шлях, - не хаваюць болю супрацоўнікі Менскай падстанцыі хуткай медыцынскай дапамогі №2, калі журналісты датэлефанаваліся ім удзень у панядзелак.

42-гадовы Андрэй Нізаў ганарыўся, што 19 гадоў свайго жыцця працаваў кіроўцам «хуткай». На старонцы мужчыны ў сацыяльнай сетцы сотні фатаграфій - разам з калегамі, у камандзіроўцы, на рыбалцы, у турпаходзе, дзесяткі здымкаў прыроды... Жыццярадасны, з пачуццём гумару, яго любілі і паважалі. Жыццё Андрэя і яго жонкі абарвалася ў суботу раніцай. Кажуць, яны ехалі за горад адпачываць. На заднім сядзенні быў іх любімы сабака, які памёр разам з гаспадарамі.

- Так атрымалася, што калі адбылося ДТЗ, наша брыгада выехала на месца здарэння, і ўжо на месцы мы ўбачылі: загінуў наш калега. Андрэй разам з жонкай памёр на месцы здарэння. А я ж яго бачыла напярэдадні, у пятніцу, ён стаяў каля сваёй машыны, усміхаўся, - успамінае фельчар хуткай дапамогі.

- Андрэй быў сапраўдным прафесіяналам, вельмі акуратным кіроўцам, гэта ўсё шанавалі. Ён з захапленнем распавядаў пра паходы, ведаў шмат анекдотаў. У 2013 годзе ён заняў першае месца ў конкурсе сярод кіроўцаў і здабыў званне найлепшага, - кажуць калегі. Андрэй і яго жонка Юля былі аднакласнікамі, жонка працавала прадаўцом. Яны разам выхавалі сына, якому цяпер 20 гадоў.

Фота: МНС