Менчукі мерзнуць у чарзе па танныя пухавікі

У менскім Палацы мастацтваў з вялікім поспехам праходзіць распродаж тавараў лёгкай прамысловасці.

Каб трапіць у гандлёвы павільён, жыхары сталіцы выстойваюць чаргу, піша open.by.

Удала праведзены распродажны кірмаш каля Палаца спорту натхніў прадстаўнікоў беларускай лёгкай прамысловасці на новую акцыю. Кошты былі анансаваныя даволі нізкія і ў дзень адкрыцця да гандлёвых палатак выстраіліся вялізныя чэргі. Ажыятаж на кірмашы назіраецца і на сённяшні дзень, а працаваць ён будзе яшчэ тыдзень. У чарзе стаяць даводзіцца, каб патрапіць унутр гандлёвага павільёна, дзе прапануюць швейныя і трыкатажныя вырабы па кошце ледзь не ўдвая ніжэйшым за крамны.

Асабліва шпарка ідзе гандаль пухавікамі. Жаночыя курткі, можа і не самых модных фасонаў, але лёгкія і дыхтоўна пашытыя каштуюць па 400 тысяч, мужчынскія па 300. Пакупнікі ў асноўным жанчыны пенсіённага ўзросту. Некаторыя дамы бяруць нават па дзве курткі - сабе і сяброўцы. Ля адзінага люстэрка ў куце павільёна сапраўдны тлум. «Ну чаго вы разглядаеце гэтую куртку, як быццам яна мільён каштуе!» - Прыспешвае адна пакупніца іншую. Мільён тут каштуе элегантнае зімовае паліто, але ў крамах яшчэ даражэй. Жанчына вельмі маленькага росту смуткуе, што вельмі хацела сабе купіць як раз такое, але тут ні адно не падышло ёй па памеры.

На стале рассыпаны куча рознакаляровых трыкатажных шапак, дарослыя і дзіцячыя незалежна ад памеру каштуюць па 50 тысяч. Ёсць даволі нядрэнныя мадэлі. Шалікі па 70, усё роўна, зімовыя або летнія. Мужчынскія байкі па 90 тысяч, швэдры па 150, джынсы ад 100 да 150 тысяч - кошты сапраўды нізкія.

Асабліва шпарка ідзе гандаль цёплымі шкарпэткамі, пару аддаюць за дваццаць тысяч, дзве пары за трыццаць, тры за пяцьдзесят. Хтосьці ўслых падлічвае, што тры разы купіць па дзве пары, выйдзе танней, чым два разы па тры. Чарга смяецца.

Акрамя адзення вялікім попытам карыстаецца пасцельная бялізна падушкі і коўдры. Падушкі з лебядзінага пуху каштуюць ад 130 тысяч, з бамбукавым валакном па 90. Плед можна набыць за 100 тысяч, ёсць розныя расфарбоўкі. Для аматараў таннасці на кірмашы ёсць нават французскія духі на разліў, і флакон для іх можна выбраць любога аб'ёму.

Кірмаш будзе працаваць да 26 лістапада.