«Белнафтахім» стварае запас дызпаліва «Арктыка» на выпадак моцных халадоў

На нафтабазах галіновай сістэмы нафтапрадуктазабеспячэння створаны запас дызельнага паліва «Арктыка».

Пра гэта charter97.org паведамілі ў прэс-службе «Белнафтахіма».

Пачынаючы з лістапада 2014 года, беларускімі нафтаперапрацоўчымі заводамі вырабляецца не толькі зімовае дызельнае паліва (ДТ-З-К5 гатунак F з гранічнай тэмпературай фільтравальнасці не вышэй за мінус 20 оС), але і дызельнае паліва гандлёвай маркі «Арктыка» з палепшанымі нізкатэмпературнымі характарыстыкамі.

Гранічная тэмпература фільтравальнасці дызельнага паліва «Арктыка» (клас 2 від I) складае не менш за мінус 32 оС. Гэта азначае, што ягонае прымяненне дазваляе захаваць працаздольнасць паліўных сістэм самых сучасных рухавікоў унутранага згарання пры значным паніжэнні тэмпературы навакольнага паветра.

Выпуск дызельнага паліва «Арктыка» ажыццяўляецца ў залежнасці ад тэмпературнага рэжыму і попыту. Плануецца, што аб'ём вытворчасці складзе каля 25 тысяч тон штомесяц. Магчымасці НПЗ дазваляюць выпускаць у месяц да 35 тысяч тон.

Якасць дызельнага паліва «Арктыка» з палепшанымі нізкатэмпературнымі характарыстыкамі цалкам адпавядае экалагічным нарматывам Еўра-5.

Рэалізацыя дадзенага віду паліва спажыўцам рэспублікі забяспечваецца як праз аптовы гандаль з прадпрыемстваў нафтапрадуктазабеспячэння ПА «Беларуснафта», так і праз сістэму АЗС агульнага карыстання.

У цяперашні час на нафтабазах галіновай сістэмы нафтапрадуктазабеспячэння створаны запас дызельнага паліва «Арктыка» ў аб'ёме, дастатковым для забеспячэння традыцыйнага попыту ў пераходны да нізкіх тэмператур перыяд. Вядуцца адгрузкі і на экспарт - у Расейскую Федэрацыю, Прыбалтыку.

Нафтаперапрацоўчымі заводамі рэспублікі (ААТ «Нафтан» і ААТ «Мазырскі НПЗ») увесь час вядзецца работа, накіраваная на павелічэнне асартыменту і паляпшэнне якасці выпускаемай прадукцыі.

Так, са снежня 2014 пачнецца пераход унутранага рынку рэспублікі на рэалізацыю дызельнага паліва ДТ-К5, вырабленага ў адпаведнасці з патрабаваннямі нарматыву Еўра-5 з ультранізкім утрыманнем серы.

Рашэнне аб вытворчасці дызельнага паліва «Арктыка» з палепшанымі нізкатэмпературнымі характарыстыкамі і прызначанага для выкарыстання ў халодным і арктычным клімаце, было прынятае ў 2011 годзе з улікам анамальна нізкіх тэмператур паветра ў зімовы перыяд, якія назіраюцца ў апошнія гады.