Мустафа Найем: Ніколі не забуду таго, што ўбачыў на вуліцах Менска

Вядомы журналіст і дэпутат Вярхоўны Рады нагадаў украінцам аб падзеях 19 снежня 2010 года ў Менску.

Украінскі журналіст Мустафа Найем, з прызыву якога роўна год таму пачаўся Еўрамайдан, заявіў, што не хацеў паўтарэння падзей на вуліцах Менска ў 2010 годзе.

«Мы маглі страціць пакаленне і будучыню, - растлумачыў ён на сваёй старонцы ў Фэйсбуку 21 лістапада. - Я ніколі не забуду таго, што ў 2010 годзе ўбачыў на вуліцах Менска: азвярэлы АМАП, раздробленыя зубы, сотні пасаджаных і тысячы якія пакутуюць у камерах цягам дваццаці гадоў. Гэта тое, што нам рыхтавалі».

21 лістапада 2013 г урад Украіны заявіў, што ў інтарэсах нацыянальнай бяспекі не будзе падпісваць пагадненне аб асацыяцыі з Еўразвязам і пераарыентуецца на Мытны саюз. У той жа дзень Найем напісаў у Фэйсбуку: «Сустракаемся а 22:30 пад манументам Незалежнасці. Апранайцеся цёпла, бярыце парасоны, гарбату, каву, добры настрой і сяброў. Распаўсюд усяляк вітаецца!»

Акцыя была нешматлікай, аднак затым пратэст паступова стаў масавым, перш за ўсё ў цэнтры і на захадзе Украіны. У лютым 2014 рэжым прэзідэнта Віктара Януковіча ўпаў. Гэта каштавала жыццяў блізу 100 пратэстуючых, якіх назвалі «Нябеснай сотняй Еўрамайдану», нагадвае БелаПАН. Сярод іх быў 25-гадовы жыхар Гомеля Міхаіл Жызнеўскі, які загінуў 22 студзеня. Адразу пасля ўцёкаў Януковіча ў Расею Крэмль пачаў спецаперацыю ў Крыме, у выніку якой паўвыспа з дапамогай спехам арганізаванага і не прызнанага сусветнай супольнасцю рэферэндума была далучаная да РФ. Пасля гэтага пачаўся рост напружанасці на Данбасе, што вылілася ў поўнамаштабныя ваенныя дзеянні. Масква, прызнаўшы удзел сваіх вайскоўцаў у забеспячэнні рэферэндума ў Крыме, адмаўляе аказанне дапамогі сепаратыстам жывой сілай і тэхнікай.

«Мяне часта пытаюцца, напісаў бы той жа заклік сёння, калі б ведаў, што ўсё так павернецца. Так, напісаў бы, - сцвярджае Найем. - Таму што цяпер яшчэ больш упэўнены, што калі б мы ў той золкі дажджлівы вечар не выйшлі на вуліцы, забітых, скалечаных і страчаных лёсаў было б куды больш».

«Мы страцілі шмат светлых жыццяў тых, каго па праве можна назваць героямі... Гэта была не проста барацьба супраць «чужых», гэта была бітва з уласным страхам перад тым, хто мацнейшы. Нам удалося зрабіць тое, чаго дагэтуль не могуць зрабіць пакаленні ў Расеі і Беларусі - мы заразілі ўладу страхам перад грамадствам, а не наадварот», - падкрэсліў украінскі журналіст, які на датэрміновых парламенцкіх выбарах 26 кастрычнік стаў дэпутатам Вярхоўнай Рады.