Згоншчык на вачах інспектараў ДАІ урэзаўся ў эвакуатар
5- 27.11.2014, 11:22
- 15,107
Дарожна-транспартнае здарэнне адбылося на скрыжаванні МКАД і вуліцы Шаранговіча.
Пакуль інспектары аддзела ДАІ Фрунзенскага РУУС афармлялі дакументы на эвакуацыю аўто, прыпаркаваных з парушэннем правілаў, у адзін з эвакуатараў урэзаўся BMW 725.
Пра гэта паведамляюць «Менск-Навіны».
Як распавяла прэс-афіцэр Фрунзенскага РУУС Вераніка Стрэльская, дарожна-транспартнае здарэнне адбылося на скрыжаванні МКАД і вуліцы Шаранговіча. Кіроўцу іншамаркі тут жа затрымалі.
Падчас разбору высветлілася, што 40-гадовы мужчына скраў аўтамабіль, які ўладальнік пакінуў яму для рамонту. Устараніўшы непаладкі, аўтаслесар пастанавіў пакатацца. Высветлілася таксама, што ён пазбаўлены правоў кіроўцы за кіраванне транспартным сродкам у стане алкагольнага ап'янення і ўжо быў судзімы за крадзеж.
Дарэчы, у крыві гора-кіроўцы выявілі 1,2 праміле алкаголю.
У дачыненні да няўдачлівага згоншчыка распачатая крымінальная справа. Яму пагражае пазбаўленне волі на тэрмін ад 2 да 7 гадоў.
