Некаторыя тарыфы і паслугі Velcom падаражэлі на 30-40%

У сярэдзіне месяца аператар Velcom абвясціў пра падвышэнне коштаў з 27 лістапада.

У кампаніі запэўнілі, што павелічэнне рахунку абанента складзе ў сярэднім 9%. Сёння Velcom апублікаваў новыя кошты на тарыфы і паслугі, многія з якіх падаражэлі значна больш, чым на 9%, а ў некаторых выпадках павышэнне дасягнула амаль 40%, піша onliner.by.

Большасць тарыфаў будуць абыходзіцца абанентам на 15% даражэй. На столькі, напрыклад, выраслі кошты на званкі і абанплату на такіх тарыфах, як «Свая сетка», «Справы сямейныя», «Лета кліча», «Кеды» і «Паўкеды». Абанплата тарыфнага плану «Усе кажуць» таксама падрасла на 15%, але хвіліна званка падаражэла адразу на 27%.

Выклікі ў рамках «BUSINESS.PRO» з сённяшняга дня будзе абыходзіцца даражэй на 15%, а на абанплату прыйдзецца накінуць яшчэ амаль 30%. Вызначыўся тарыф «Smart 1000», штомесячная плата за які вырасла са 144 000 да 199 900 рублёў - падаражанне амаль на 40%! Кошт званкоў пры гэтым павялічыўся на 15%. У аналагічных прапорцыях падаражэў «Smart 500». Адзначым, што адначасова на ТП «Smart 1000» аб'ём уключанага трафіку вырас удвая, да 2 ГБ, а на ТП «Smart 500» - з 500 МБ да 1 ГБ.