Вінаваты ў аварыі ў Менску напярэдадні ледзь не забіў сваю сям'ю

Паводле факту дарожна-транспартнага здарэння, учыненага сёння ў Менску на вуліцы Гая, распачатая крымінальная справа.

Як паведамілі БелТА ў Следчым камітэце Беларусі, крымінальная справа распачатая паводле ч.3 арт.317 (парушэнне правіл дарожнага руху, што пацягнула праз неасцярожнасць смерць дзвюх асоб) КК. Следчы камітэт выяўляе акалічнасці таго, што здарылася.

Сёння каля 10 гадзін кіроўца 1976 года нараджэння, кіруючы аўтамабілем "Аўдзі А8", дапусціў сутыкненне з некалькімі транспартнымі сродкамі. Следствам выяўлена, што ён сутыкнуўся з аўтамабілем "Аўдзі 100", пасля чаго пашкодзіў яшчэ некалькі прыпаркаваных уздоўж дарогі аўтамабіляў.

У выніку дарожна-транспартнага здарэння кіроўца і пасажырка "Аўдзі 100" памерлі на месцы. Вінаваты таго, што здарылася, спрабаваў уцячы з месца здарэння, аднак быў затрыманы супрацоўнікамі міліцыі. З ім працуюць следчыя. Прызначаны шэраг экспертных даследаванняў, у тым ліку судова-медыцынская і аўтатэхнічная. У кіроўцы "Аўдзі А8" адабраныя біялагічныя ўзоры на прадмет ужывання алкаголю, наркатычных сродкаў і псіхатропных рэчываў.

На месцы здарэння прадаўжаюць працаваць следчыя цэнтральнага апарата і кіравання Следчага камітэта Менска. Для арганізацыі працы і каардынацыі дзеянняў на месца ДТЗ выбыла кіраўніцтва Следчага камітэта і ГУУС Менгарвыканкама.

Акрамя таго, следчымі праводзіцца агляд месца жыхарства вінаватага ДТЗ, дзе былі выяўленыя ягоныя блізкія (жонка і двое непаўналетніх дзяцей) з цялеснымі пашкоджаннямі рознай ступені цяжкасці.