РПЦ: Праваслаўны банкінг абароніць ад крызісу

Расейскія фінансісты плануюць стварыць праваслаўны банкінг.

Новая праваслаўная фінансавая сістэма можа абараніць расейскую эканоміку ад крызісу, лічыць старшыня сінадальнага аддзела ўзаемадзеяння Царквы і грамадства Маскоўскага патрыярхату протаіерэй Усевалад Чаплін (на фота - злева), паведамляе BBC.

Паводле слоў Чапліна, у групы расейскіх фінансістаў ёсць план стварэння праваслаўнага банкінгу. Праект прадугледжвае вылучэнне сродкаў не пад працэнт, а пад прыбытак будучага прадпрыемства.

Згодна з планам, бакі адмаўляюцца ад удзелу ў грашовых патоках ад вытворчасці тытунёвай і алкагольнай прадукцыі, ігральнага бізнесу, выкарыстання працы нелегальных мігрантаў і іншых рэчаў, якія не ўхваляюцца хрысціянствам.

"Неабходна ў свеце нарошчваць ролю механізмаў, якія не заснаваных на ліхвярстве", - адзначыў Чаплін.

Раней стала вядома аб тым, што ў Татарстане плануецца запусціць пілотны праект ісламскага банкінгу, які дзейнічае паводле аналагічнага прынцыпу - грошы вылучаюцца не пад працэнт, а пад прыбытак.

Фота: rian.ru