Улады хочуць забраць Бабруйскі піўзавод у Heineken

Віцэ-прэм'ер Міхаіл Русы даручыў на працягу тыдня разабрацца з прычынамі стратнай працы завода.

Чыноўнік узяў удзел у пасяджэнні аблвыканкама, на якім былі падведзеныя вынікі работы народнагаспадарчага комплексу рэгіёну за 2013 год, перадае БелТА.

У Міхаіла Русага выклікала здзіўленне інфармацыя аб тым, што такая буйная і вядомая піваварная кампанія ўжо на працягу цэлага шэрагу гадоў працуе стратна на тэрыторыі Беларусі. «Паводле эканамічных законаў такія прадпрыемствы павінны закрывацца альбо прадаваць свае актывы больш паспяховым кампаніям. Раз гэтага не адбываецца, значыць, у Heineken ёсць нейкая іншая крыніца даходу», - лічыць Міхаіл Русы.

З гэтым пытаннем трэба дэталёва разабрацца на працягу бліжэйшага тыдня, запатрабаваў віцэ-прэм'ер. «Бо, калі прадпрыемства не атрымлівае прыбытак, значыць, і не плаціць адпаведныя падаткі ў бюджэт - гэта ненармальна, тым больш для такога вядомага брэнда, як Heineken», - лічыць Міхаіл Русы.

У сваю чаргу старшыня Магілёўскага аблвыканкама Пётр Руднік прапанаваў прапрацаваць пытанне аб увядзенні для ўсіх прадпрыемстваў і арганізацый рэгіёну безумоўнага да выканання паказчыка па рэнтабельнасці рэалізаванай прадукцыі, які павінен скласці не ніжэй за 10-15%.