МУС Украіны: Аэрапорты Крыма захапілі вайскоўцы РФ, гэта ўварванне

Кіраўнік МУС Арсэн Авакаў пацвердзіў блакаванне расейскімі вайскоўцамі аэрапортаў Крыма.

Ён заявіў, што расцэньвае гэта як «узброенае ўварванне і акупацыю». Пра гэта Арсэн Авакаў напісаў у сваім акаўнце ў сацыяльнай сетцы «Фэйсбук», паведамляючы пра захоп аэрапорта Севастопаля і Сімферопаля.

Прыводзім тэкст паведамлення міністра цалкам:

«1. Аэрапорт Бельбек. Заблакаваны ваеннымі падраздзяленнямі флоту РФ. Унутры аэрапорта знаходзяцца вайскоўцы і памежнікі Украіны. Звонку - вайскоўцы ў камуфляжы і са зброяй без апазнавальных знакаў, але яны не хаваюць сваёй прыналежнасці. Аэрапорт не працуе. На знешнім перыметры пасады МУС Украіны. Узброенага сутыкнення пакуль няма.

2. Аэрапорт Сімферопаль. Каля 12 ночы група ў грамадзянскім, каля 100 чалавек, якая назвалася казачай сотняй, пераадолеўшы агароджу на тэрыторыю аэрапорта выйшла на поле аэрадрома.

Сіламі ўнутраных войскаў і міліцыі гэтыя людзі былі адціснутыя спачатку ў будынак аэрапорта, а затым і зусім за тэрыторыю. Зброя не ўжывалася. Раён аэрапорта быў пакінуты «казакамі» каля гадзіны ночы - пагрузіліся на тэнтаваныя КамАЗы і з'ехалі.

Каля 1.30 ночы ў будынак аэрапорта прыбылі на некалькіх грузавіках 119 вайскоўцаў з аўтаматычнай зброяй у камуфляжы без апазнавальных знакаў. Увайшлі ў будынак аэрапорта, размясціліся ў памяшканні рэстарана. Не хаваюць сваёй прыналежнасці да ўзброеных сіл расейскай федэрацыі. На пытанні ўкраінскіх супрацоўнікаў МУС «вы вайскоўцы і не маеце права тут знаходзіцца» - адказваюць коратка - не маем інструкцый весці з вамі перамовы. Сітуацыя статычная, зброя з абодвух бакоў не ўжывалася. Расейскія вайскоўцы статычна назіраюць за працай аэрапорта, наўпрост не ўмешваючыся.

Унутраныя войскі і МУС Украіны ўзмацнілі нарады ў раёне аэрапорта. Напружанне нарастае. Супрацьстаяць рэгулярным ваенным сілам органы правапарадку не змогуць.

Тое, што адбываецца, ацэньваю, як ўзброенае ўварванне і акупацыя. У парушэнне ўсіх міжнародных дамоваў і нормаў. Гэта прамая правакацыя збройнага кровапраліцця на тэрыторыі суверэннай дзяржавы.

Гэта ўжо не кампетэнцыя МУС. Гэта кампетэнцыя СНБА.

Пакуль яшчэ няма прамога ўзброенага сутыкнення, павінны гаварыць дыпламаты».

Нагадаем, пра захоп аэрапортаў Севастопаля і Сімферопаля стала вядома сёння ноччу. Раней паведамлялася, што ў Крым збіраўся прыляцець в.а. абавязкі прэзідэнта Украіны Аляксандр Турчынаў для мірнага ўрэгулявання сітуацыі.

Учора ў Сімферопалі невядомыя захапілі парламент і ўрад аўтаноміі і ўсталявалі на будынках расейскія сцягі. Праваахоўнікі адкрылі крымінальную вытворчасць па артыкуле «тэракт».

Каля паўтысячы чалавек са сцягамі Расеі і Крыма каля парламента патрабавалі прызначыць рэферэндум аб дзяржаўнай прыналежнасці аўтаномнай рэспублікі.

Днём спікер Уладзімір Канстанцінаў прызначыў пазачарговую сесію парламента, на якой дэпутаты прызначылі на 25 траўня рэферэндум па пашырэнні паўнамоцтваў аўтаноміі, а таксама выказаў недавер Савету міністраў аўтаноміі, які з лістапада 2011 года ўзначальваў Анатоль Магілёў.

Фота: REUTERS/David Mdzinarishvili