Міліцыянт на пікеце: Скручу і завязу ў лес
50- 3.02.2014, 12:44
- 46,600
Супрацоўнік міліцыі пагражаў удзельнікам пікета ў Менску.
Інцыдэнт адбыўся ў нядзелю каля ўніверсама «Беларусь», дзе член Завадской выбарчай камісіі Вольга Пятроўна Крыжаноўская сумесна з супрацоўнікамі міліцыі (адзін з іх старшына Бобрык) запатрабавалі спыніць пікет па зборы подпісаў за вылучэнне ў якасці кандыдата на мясцовых «выбарах» сябра аргкамітэта па стварэнні партыі Беларуская Хрысціянская Дэмакратыя.
Прадстаўнікі ўлады прыніжалі актывістаў і пагражалі ім, патрабуючы аддаць падпісныя лісты, паведамляе прэс-служба БХД.
«Скручу і завязу адсюль у лес», - заявіў адзін з міліцыянтаў.
Пасля таго, як з-за паводзінаў прадстаўнікоў уладаў пачалі масава абурацца мінакі, член участковай камісіі сышла. За ёй сышлі і міліцыянты.
«Прадстаўнікі завадской выбарчай камісіі з'явіліся разам з міліцыяй вельмі раптоўна. І вельмі раптоўна зніклі, калі ўбачылі, што сварыцца з Віталём Рымашэўскім сабе даражэй. Ён іх вельмі добра спыніў. Прадстаўнікам выбарчай камісіі не спадабалася, што на стэндах быў надпіс «Беларуская хрысціянская дэмакратыя». Яны пыталіся: «Чаму вы не ад партыі, а напісана што ад партыі? Не маеце права, зварочваем». Прычым слова «партыя» нідзе не ўжывалася. БХД - ствараная партыя, якую ўлады баяцца рэгістраваць. І ўсімі сродкамі не даюць нават саму назву абсалютна легальна выкарыстоўваць на пікетах» - распавёў удзельнік мерапрыемства Павел Пракаповіч.