«Уралкалій» не збіраецца вяртацца да супрацоўніцтва з БКК

Беларуская і расейская кампаніі не маюць намеру працаваць у ранейшым фармаце.

Кіраўнікі "Уралкалію" і ААТ "Беларуская калійная кампанія" (БКК, трэйдар "Беларуськалію") упершыню за паўгода правялі асабістую сустрэчу. Але, па дадзеных крыніцы расейскага выдання "Коммерсант", аб аднаўленні партнёрства размова не ішла. Наадварот, бакі абмяркоўвалі магчымы выхад "Уралкалію" з капіталу непрацуючага ЗАТ БКК - да жніўня 2013 года сумеснага трэйдара кампаній. Нягледзячы на змену акцыянераў "Уралкалію" і згасанне канфлікту, працаваць па старых дамоўленасцях бакі не збіраюцца

Гендырэктар падкантрольнага АНЭКСІМу і "Уралхіму" "Уралкалію" Дзмітрый Осіпаў 31 студзеня ўпершыню правёў сустрэчу з кіраўніком ААТ "Беларуская калійная кампанія" (ААТ БКК) Аленай Кудравец. Гэта была першая сустрэча на такім узроўні з моманту спынення ў канцы ліпеня 2013 года сумесных продажаў "Уралкалію" і "Беларуськалію" на сусветным рынку праз іх СП ЗАТ "Беларуская калійная кампанія" (ЗАТ БКК). Гэты разрыў прывёў да палітычнага канфлікту, у якім актыўны ўдзел узяў Лукашэнка, які патрабаваў крымінальнага пераследу мэнэджэраў і ўладальнікаў "Уралкалію". А апошняя спроба ранейшага гендырэктара расейскай кампаніі правесці ў жніўні 2013 года перамовы з беларускім бокам завяршылася яго арыштам. Сустрэча Дзмітрыя Осіпава з Аленай Кудравец прайшла ў Маскве.

Па дадзеных крыніц, знаёмых з ходам перамоваў, бакі абмеркавалі варыянты выхаду "Уралкалію" з ЗАТ БКК, дзе цяпер яму належыць 50%, але рашэнняў прынята не было. Прадстаўнік ААТ БКК Ірына Саўчанка пацвердзіла, што "абмяркоўваліся бягучыя пытанні ўзаемадзеяння, звязаныя з акцыянернай доляй "Уралкалію" ў ЗАТ БКК". Ва "Уралкаліі" сітуацыю каментаваць не сталі. Акцыянерамі ЗАТ БКК, акрамя "Уралкалію" з'яўляюцца "Беларуськалій" (45%) і Беларуская чыгунка (5%). Да сярэдзіны 2013 года СП займала каля 43% сусветнага рынку калію. Але ў канцы ліпеня "Уралкалій" аб'явіў аб пачатку самастойнага трэйдзінгу. Зараз "Уралкалій" гандлюе праз свайго трэйдара Uralkali Trading, а "Беларуськалій" - праз уласнае ААТ БКК, створанае ў кастрычніку 2013 года.

Крыніцы запэўніваюць, што аб аднаўленні супрацоўніцтва "Уралкалію" і "Беларуськалію" ў рамках ЗАТ БКК гаворка не ідзе. "Калі кампаніі і змогуць працаваць зноў разам, то гэта будзе зроблена ў рамках новага трэйдара і з іншым размеркаваннем доляй у ім", - адзначае адзін з суразмоўцаў. Гэта звязана з тым, што, нягледзячы на розніцу ў аб'ёмах вытворчасці (10,5 млн тон "Уралкалію" ў 2013 годзе супраць 5,7 млн тон "Беларуськалію"), прадукцыя бакоў прадавалася парытэтна.

Канстанцін Юмінаў з Raiffeisenbank адзначае, што "Уралкалію" і "Беларуськалію" неабавязкова ствараць СП па старым прынцыпе, калі кампаніі дамовяцца аб аднаўленні сумеснай працы. "Яны могуць выкарыстоўваць больш простую схему супрацоўніцтва ў выглядзе частковага аб'яднання трэйдзінгу", - кажа эксперт. Пры гэтым, адзначае ён, новыя ўладальнікі "Уралкалію" - АНЭКСІМ і "Уралхім" - паспрабуюць атрымаць максімальную выгаду з вяртання да сумеснай працы, так як для аднаўлення сумесных продажаў ёсць палітычная воля, але няма жорсткіх патрабаванняў з боку дзяржаў.

Фота: Bloomberg