Лукашэнка і крах «імперыі Курчанкі»

Мінімум трое з 18-ці ўкраінскіх чыноўнікаў, чые актывы замарожаныя ў ЕЗ, звязаныя з бізнесам Лукашэнкі.

Самыя буйныя бізнес-праекты з беларускімі партнёрамі ва ўладальніка Усходне-Еўрапейскай паліўна-энергетычнай кампаніі (УЕПЭК) Сяргея Курчанкі. Да падзей на Еўрамайдане ён лічыўся адным з самых паспяховых маладых прадпрымальнікаў Украіны, піша «Завтра твоей страны».

У 2009 годзе 24-гадовы Сяргей Курчанка стварыў групу з 55 кампаній рознага роду дзейнасці пад назвай «Газ Украіна», якая затым была ператвораная ва Усходне-Еўрапейскую паліўна-энергетычную кампанію (УЕПЭК). Імклівы ўзлёт харкаўчаніна незалежныя ўкраінскія СМІ звязваюць з яго блізкасцю да клану Януковіча.

Створанай Курчанкам групе кампаній УЕПЭК атрымалася фактычна манапалізаваць украінскі рынак звадкаванага газу, а таксама заняць сур'ёзныя пазіцыі ў гандлі нафтапрадуктамі.

УЕПЭК мае трэйдынгавыя кампаніі ў многіх краінах, але менавіта прадпрыемствы, якія знаходзяцца ў Беларусі, былі асноўнымі пастаўшчыкамі нафтапрадуктаў ва Украіну. У прыватнасці, кампаніі Курчанкі куплялі бензін і дызельнае паліва, перапрацаванае на Мазырскім і Наваполацкам НПЗ, у Беларускай нафтавай кампаніі, беларускіх «дочак» расейскіх холдынгаў ТНК-BP (цяпер «Раснафта»), «Лукойла», «Газпрама». У структуры продажаў групы УЕПЭК на бензін даводзілася 56%, на дызпаліва - 7%, на газ - 37%.

Цяпер «імперыя Курчанкі» перажывае не лепшыя часы.

Адразу пасля перамогі Еўрамайдана алігарх уцёк за мяжу. Украінскія выданні паведамлялі, што Курчанку прытулілі ў Беларусі. Кіраўнік партыі УДАР Віталь Клічко нават тэлефанаваў Аляксандру Лукашэнку, патрабуючы выдачы Курчанкі і былога міністра ўнутраных спраў Украіны Віталя Захарчанкі. Аднак Лукашэнка запэўніў, што ні Курчанкі, ні Захарчанкі на тэрыторыі Беларусі няма. Паводле інфармацыі ўкраінскіх СМІ, цяпер Курчанка можа знаходзіцца ў Маскве.

Між тым, яго холдынг развальваецца. У лютым 2014 года бізнесмен перадаў Адэскі НПЗ расейскаму банку ВТБ, у якога браў крэдыт на набыццё завода.

У сакавіку 2014 года Нацыянальны банк Украіны прызнаў неплацежаздольнымі два банкі, якія ўваходзілі ў холдынг Курчанкі: «Брокербізнесбанк» і «Рэал Банк». А ў канцы мінулага тыдня стала вядома, што выдавецкі дом Forbes адклікаў у кампаніі Курчанкі ліцэнзію на выпуск версіі часопіса Forbes-Украіна.

На думку экспертаў, пераразмеркаванне актываў Курчанкі можа стварыць праблемы для прасоўвання беларускіх нафтапрадуктаў на ўкраінскі рынак.

Электроды ад братоў Клюевых

У «чорны спіс» Еўразвяза ўключаныя яшчэ некалькі буйных украінскіх бізнесменаў, якія маюць інтарэсы ў Беларусі. Сярод іх, былы кіраўнік адміністрацыі прэзідэнта Андрэй Клюеў і яго брат Сяргей Клюеў. Абодва ўваходзяць у топ-100 самых багатых людзей Украіны. Яны з'яўляюцца саўладальнікамі шматпрофільнай прамыслова-інвестыцыйнай групы «Укрпадшыпнік». У склад холдынгу братоў Клюевых ўваходзіць Арцёмаўскі машынабудаўнічы завод «Вістэк», які пастаўляе электроды на беларускі рынак.

Не выключана, што сумесныя бізнес-праекты з беларускімі прадпрыемствамі былі і ў Аляксандра Януковіча - старэйшага сына Віктара Януковіча.

Самы буйны актыў Аляксандра Януковіча - швейцарская кампанія «МАКА-Трэйдынг», якая займалася экспартам вугалю. Па выніках першага паўгоддзя 2013 года гэта кампанія прадала 400 000 тон вугалю ў розныя краіны свету. За гэты ж перыяд, як сведчаць дадзеныя Нацыянальнага статычнага камітэта, Беларусь імпартавала 17 тыс. тон украінскага антрацыта на суму 1,8 млн. даляраў.

Аднак пакуль невядома ці пастаўляў сын былога ўкраінскага прэзідэнта вугаль у нашу краіну.

Пастанова Рады Еўразвяза аб замарожванні актываў 18 грамадзян Украіны набыла сілу 6 сакавіка 2014 года. Эканамічныя санкцыі ўведзеныя супраць былога прэзідэнта Віктара Януковіча і яго сыноў: Аляксандра і Віктара, экс-прэм'ер-міністра Мікалая Азарава і яго сына, экс-кіраўніка МУС Украіны Віталя Захарчанкі, экс-генпракурора Віктара Пшонкі і яго сына, а таксама цэлага шэрагу набліжаных да клану Януковіча бізнесменаў.

Пастанова сапраўдная на працягу 1 года: да 6 сакавіка 2015 года.